Djadumingu último 24 di novèmber Akademia Popular Errol Scoop a organisá un
ekskurshon titulá “Desaroyo pa ken? E ekskurshon su meta ta pa hasi pueblo di Kòrsou
sabidó di un realidat skondí. E ekskurshon aki ta un rekorido bibu i informativo pa laga
pueblo di Kòrsou será konosí konkretamente ku vários área di kosta sur di Kòrsou
kaminda tin proyekto turístiko di desaroyo ku ta violá regla, burla di lei i trapa
derechonan di pueblo.
Akademia Popular Errol Scoop a hasi e rekorido aki pa duna esnan interesá
informashon konkreto i pa laga nan mira ku nan propio wowo kiko ta pasando ku
Kòrsou.
E ekskurshon a ranka sali ku un konvoi yen for di Sambil. Promé parada tabata Playa
Parasasa. A sera parti di e playa pa publíko pa seguridat for di tempu ku Rei Willem
Alexander tabata di bishita na Kòrsou. Djei e karavana a bai tira un bista na Zakito
kaminda ta trahando 7 edifisio haltu monstruoso for di rotònde di WTC te na
Aqualectra. Aki ta trahando apartamento luhoso ku ta kosta mas ku 1 mion. Pa hür tin
ku paga for di 4000 dollar pa luna. Aki a dèmpel laman kap pal’i mangel (mangrof),
koba den laman i opstakulisá e fluho di awa ku mester drenta i sali den e binnenwater.
Kaminda aworaki ta Aqualectra ta planiá pa bini un di dos hotèl Sunscape pa turistanan
krusero. Despues di Zakito a sigui pa Corendon ku a sera e pasashi riba su tereno pa
públiko. Nan no ta pèrmití bùs di turista pasa di einan. Loke por difikulrá konstrukshon
di e hotèl nobo riba tereno di Aqualectra. E Parke di mangel ta otro proyekto den e
área. E awa den e parke aki ta kontaminá ku awa sushi di kloaka di hospital. Esaki ta
formando peliger pa salú di hende. For di riba brug Juliana e ekskurshon por a mira e
koloso di beton ku a traha riba Kleine Werf den haf di Kòrsou. Un edifisio haltu ku no ta
kuadra ètòl ku e arkitektura di Willemstad; siudat patrimonio di humanidat. Tabata tin
protesta di Monumenten Fonds i di Stadsherstel pero a bombardia pueblo ku e proyekto
aki. Gobiernu a duna pèrmit di konstrukshon. Den e proyekto mionario aki tin
partisipashon di APNA i CPA.
Den Pietermaai ta un situashon sumamente tristu. Hulandesnan a kumpra tur kas den
Pietermaai i a konstrui di e kasnan te na laman. No a laga niun pasashi pa pasa entre e
kasnan bai laman. Antes por a kana di Pietermaai kantu di laman bai te Maripanpun
awe esaki no por mas. Invershonistanan makamba a podera di henter e kosta. Por bien
lubidá piskamentu ku landamentu den e parti aki di Kòrsou. E monumento Kas di
Pueblo lo bira parti di un hotèl mas ku ta bini den e área aki.
Baoase tabata e invershonistanan makamba mas tribi ku e karavana a eksperensia.
Ora a yega einan un persona di e hotèl aki a sali bin bisa e ekskurshon ku no por subi e
pida tereno ku ta bai laman. Ora a mustra e persona riba e bòrchi ku ta bisa ku laman ta
liber e persona di Baoase a bisa nan ku ta nan tereno i ku nan por bai reklamá si nan ke
serka gobièrnu. Hotel Baoase a kumpra praktikamente tur kas den bisindario pa amplia
e hotèl i pa hospedá nan trahadónan. E último ampliashon di Baoase ta un kibra ola ku
después nan a kambia hasi un isla chikitu den laman. Nan a sigui koba i dempel laman
hasiendo hopi daño na naturalesa. Di Baoase e ekskurshon a sigui pa Maripampun.
Ora tur hende a kere ku e pida playa na Maripampun lo a keda pa pueblo ta resultá ku
einan ta bini un waf pa yate.
Penúltimo stòp tabata Caracasbaai. Aki tambe tin un plan pa basha betòn i kambia e
naturalesa di e playa. E último stòp tabata Janthiel. Aki a bira un bario di makamba
kaminda nan tin nan propio supermerkado, tienda, bar i café, spa i playa. E hotèlnan
kaminda nan ta biba i hospedá ta e.o. Livingstone, Papagayo, Morena i Chogogo.
Na entrada pa bai Janthiel nèt despues di e rotònde ta bini un kompleho di apartamento
di tres shen mil dollar pa unu.
Manera por mira ta yena Kòrsou ku kondominio i apartamento luhoso pa estranheronan
mionario bende i hür ku mionarionan rònt mundu. E trahamentu aki ta un nogoshi
mionario. Banda di esaki gobièrnu tin lista di siudadanonan sin kas wardando riba e
lista di espera sin nunka yega na bùrt. Den e último dékadanan gobièrnu no a traha
niun solo kas pa pueblo. E baratio di gobièrnu di Kòrsou ta inkreibel. Mionarionan ta
haña tereno pa konstruí apartamentu pa después nan bende nan ku otro mionario sin
Kòrsou saka probecho. Ku e aktonan di baratio aki gobièrnu ta sera e yu di Kòrsou den
e isla di moda ku e no tin un bista riba e laman presioso rondó di Kòrsou. E yu di
Kòrsou no por mira e bunita laman ku ta rondon’é. E no por pasa yega kosta ni playa
mas. El a bira isleño atrapá den konstrukshonnan haltu di beton. Asina Kòrsou ku un
tempu tabata di yu di Kòrsou a para bira propiedat di stranhero mionario. Ta p’esei
Akademia Popular Errol Scoop e ala di formashon emansipatorio di Movementu Kousa
Promé ta puntra Desaroyo pa ken?
Indira Boelbaai 6672178
Giselle Rosalia 5145288
