Den kuadro di e “Protekto Bibienda Pagabel/Woondeal“ ta bai traha 148 bibienda den e área di Dawari. Kontrario na e añanan anterior, lo no rosa e futuro áreanan di konstrukshon di bibienda i laga nan kompletamente seku mas, kaminda ta destruí tur tipo di vegetashon.
Den e Nota Maneho di Tereno Boneiru 2022 – 2025 a stipulá ku lo desaroyá e futuro áreanan di konstrukshon di bibienda konforme e método di ‘desaroyo di área’ i den esaki mester tin kestion di ‘desaroyo naturalesa inklusivo’, kaminda mas tantu posibel ta konservá i fortifiká e vegetashon eksistente, pa medio di stimulashon di kresementu di e vegetashon akí. Ta bai ‘fit’ e bibiendanan den e vegetashon eksistente i e vegetashon ku ta nobo plantá.
E área di konstrukshon di bibienda Dawari ta e promé área kaminda ta apliká e ‘aserkamentu naturalesa inklusivo’. Personalmente diputado Anjelica Cicilia a ehekutá e promé desaroyo bèrdè. Dentro di poko ta bai invitá e habitantenan ku ta biba rònt di e área akí pa un reunion, kaminda ampliamente lo duna splikashon tokante e desaroyonan resien i di futuro den e bisindario. Durante e seshon akí nos ta bai pone tur hende na altura di e plannan i di e impakto ku esakinan posibelmente por tin riba e área i su bisindario.
Na momentu ku kuminsá ku konstrukshon den e área di Rincon Pariba tambe lo apliká e aserkamentu naturalesa inklusivo.
A prepará e desaroyo bèrdè akí den kolaborashon ku stakeholdernan lokal, manera Bon Bèrdè i Tera Bara i e lo keda ehekutá mas aleu huntu ku e entidatnan akí tambe.
Diputado Anjelica Cicilia: “E método di aserkamentu naturalesa inklusivo mediante desaroyo di área no ta solamente úniko pa Boneiru, pero tambe pa tur parti karibense di Reino. Boneiru ta bai introdusí vários instrumento inovativo riba tereno di konstrukshon di bibienda moderno”.
