kuminsando ku e diferente sekshonnan di Komunidat di Skol Boneriano (SGB).
E programa di greenhouse pa skol ta un parti di e programa di bèrdura i fruta di Salubridat Públiko den kuadro di e aserkamentu di Skol Salú/Hóben Sa Bo Peso Adekuá (JOGG).
E aserkamentu di Skol Salú/Hóben Sa Bo Peso Adekuá (JOGG) ta dirigí su mes riba stimulashon di un estilo di biba salú serka muchanan di enseñansa básiko i hóbennan di Komunidat di Skol Boneriano (SGB): ‘Un estilo di biba salú pa un bida salú i un futuro salú’. Ta bai ekstendé e programanan pa stimulashon di un estilo di biba salú i hiba nan den nos barionan tambe den forma di partisipashon di mayor i bario i mas aleu den otro bisindarionan tambe. Esaki pasobra un ambiente salú ta un kondishon importante pa logra un estilo di biba salú, no solamente serka nos hóbennan, pero tambe serka otro habitantenan di Boneiru.
E programa di bèrdura i fruta ta konsistí di 5 faseta: programa di greenhouse pa skol, trayekto di edukashon pa skol, programa di greenhouse pa bario, trayekto di edukashon pa bario i e kampaña di konsientisashon ‘Sembra awe pa kosechá mañan’. Na luna di desèmber 2019 a lansa e kampaña ‘Sembra awe pa kosechá mañan’ na ‘Taste of Bonaire Health’, pero na luna di mart 2020 a para esaki un ratu pa motibu di e situashon di COVID. Dentro di poko ta kuminsá atrobe ku e kampaña.
Ministerio di Asuntunan Ekonómiko di Hulanda ta finansiá e programa di greenhouse. Diferente profeshonal di Boneiru a duna un aporte na esaki a base di nan ekspertisio.
Meta di e programa di bèrdura i fruta ku greenhouse na skol ta pa krea afinidat serka nos muchanan i hóbennan pa kultivá nan propio kuminda pa proveé den e nesesidat pa alimento salú.
Ta trata di un aserkamentu duradero ku gradualmente ta integrá den kuríkulo di skol. Di e manera aki bèrdura i fruta ta bira aksesibel pa tur hende i esaki ta kontribuí na stimulashon di salú i kombatimentu di pobresa. E departamentu di Sosten Sosial di nos Direktorado di Komunidat i Kuido ta traha huntu ku Salubridat Públiko i a nombra un kordinadó, un eksperto boneriano riba tereno di plantamentu, ku ta bai duna sosten na nos skolnan. Huntu ku e sostenedó di departamentu di Sosten Sosial e lider di programa di Salubridat Públiko lo sigui guia i sostené e skolnan den nan aserkamentu spesífiko di e greenhousenan.
Ku e manera di atendé ku COVID un biaha mas e importansia di un estilo di biba salú a keda probá. Salubridat Públiko ta kontentu ku pa medio di e programa di bèrdura i fruta nan por sigui pone énfasis riba importansia di un estilo di biba salú.
Na tur sekshon di Komunidat di Skol Boneriano (SGB) nan a reakshoná entusiasmá ku traspaso di e greenhousenan.
E sekshonnan di Komunidat di Skol Boneriano (SGB) a risibí material tambe di Salubridat Públiko pa kuminsá kuné, manera e manual básiko pa plantamentu di Fundashon Desaroyo di Áreanan di Kunuku na Boneiru (POP), krewá, harpa, skòp i algun simia.
Laga nos sostené e sekshonnan di Komunidat di Skol Boneriano (SGB) i planta aktivamente na kas tambe.
Ban Sembr’awe pa kosechá mañan i hiba un “estilo di biba salú”
