For di algun dia Boneiru ta disponé di nuebe mashin di kondon na sitionan sentral. Siman pasá diputado Nina den Heyer tabata presente na momentu ku a pone e promé mashin di kondon riba enkargo di departamento di Salubridat Públiko na Carwash Damrik. E mashinnan tin steker kolorido i por rekonosé nan na e lema ‘Kondon Kuné’. E kondonnan ta kosta $ 0,50 pa unu. E mashinnan ta aseptá solamente quarter.
Departamento di Salubridat Públiko ta spera ku e mashinnan di kondon ta sòru pa mas hende hasi sèks na un manera seif. Hasi sèks na un manera seif por prevení malesa transmití seksualmente (soa), hiv/aids i embaraso (hubenil) indeseá. No ta promé biaha ku e departamento ta dediká atenshon na hasi sèks na un manera seif. Den pasado e departamento komo parti di e kampaña ‘Sali Seif’ a parti kondon grátis durante karnaval.
A pone e mashinnan di kondon na e siguiente sitionan:
Sentro Médiko Sùit, Klínika di dòkter Antriol, Sentro di Bario Nort’i Saliña, Sentro di Bario Amboina, Donkey Beach / Te Amo Beach, Carwash Damrik, Karels Beach Bar, Cozy Place i Toko Magdalena. Na kada mashin por kumpra kuater tipo di kondon di e marka ONE. Ta trata di ONE Super Sensitive, ONE Legend XL, ONE Pleasure Plus i ONE Super Studs. E kondonnan akí ta kumpli ku e norma di kalidat oropeo. Pa mas informashon:
www.bonairegov.com/pa/habitante/kondon-automaat
