Riba djaweps 1 di desèmber 2022 ta Dia Mundial di Aids. Tur aña riba e dia akí ta dediká atenshon na e lucha kontra aids. Riba e dia akí ta hasi un yamada riba tur hende pa pega un sinta kòrá na nan paña pa mustra ku nan ta para huntu den e lucha kontra e vírùs di hiv i e malesa aids. Ta para ketu tambe na tur hende ku for di kuminsamentu di e epidemia di aids (entre tantu ya kaba esaki ta 40 aña pasá) a kontagiá ku e vírùs di hiv òf a haña e malesa aids, òf ku tin di haber ku konsekuensianan di esaki.
Pa por para mas fuerte huntu den e lucha kontra e vírùs di hiv i e malesa aids ta importante pa duna mas atenshon na e aksesibilidat desigual na kuido pa tratamentu di esaki. Pa e motibu akí e aña akí a skohe pa mantené e tema ‘Stòp desigualdat’ riba Dia Mundial di Aids. Ku e tema akí komunidat internashonal ta insistí riba atendementu ku desigualdat den kuido i pa tuma e akshonnan ku ta nesesario pa yuda terminá aids. Ehèmpel di akshonnan ku mester tuma ta:
- Oumento di optenibilidat, kalidat i kapasidat di kuido di salú pa tratamentu di hiv, tèstmentu i prevenshon, di manera ku personanan kontagiá por risibí atenshon médiko adekuá.
- Adaptashon di lei, maneho i aserkamentu pa redusí e prewisio i eksklushon ku hendenan ku aids ta konfrontá, di manera ku ta trata nan ku mas rèspèt.
Den transkurso di añanan ya kaba a logra hopi progreso den e lucha kontra hiv i aids. Pero na Boneiru tambe ta keda nesesario pa duna atenshon na tèstmentu pa hiv i aids, prinsipalmente bou di gruponan di riesgo. Esaki pasobra aunke ku riba nos isla bo por bira bieu ku e vírùs di aids, bo lo tin ku hasi tèst pa esaki promé i despues risibí tratamentu tambe. Serka bo dòkter di kas fásilmente bo por hasi tèst.
Kuido pa pashènt di hiv ta hopi bon organisá na Boneiru, asina departamento di Salubridat Públiko ta duna di konosé. E medionan di mas avansá ta disponibel i nan ta anda bon ku privasidat di e pashèntnan ku ta haña tratamentu. E departamento ta partisipá ku na Boneiru tin mas òf ménos 90 persona registrá ku hiv. Na aña 2018 esaki tabata 75 persona. E parti mas grandi di e personanan akí tin entre 25 i 72 aña di edat.
Ta importante tambe pa kombatí e tabú ku tin rònt di aids. Esaki ta kuminsá por ehèmpel ku enseñansa i kampañanan di konsientisashon tokante e tópiko akí. Esaki ta importante pasobra e vírùs di aids no ta diskriminá, pero hopi biaha hende ta sinti bèrgwensa ora nan pega ku e vírùs. Por sierto hende hòmber i hende muhé por pega ku e vírùs sin ku nan ta ripará esaki. Pa e motibu akí ta hopi importante pa prevení plamamentu di e vírùs di hiv. Departamento di Salubridat Públiko ta hasi un yamada riba tur hende pa hasi sèks na un manera seif, pa bai hasi tèst ora tin riesgo di kontagio, i pa kuminsá na tempu ku remedi ku ta frena aids den kaso di kontagio ku aids.