KRALENDIJK,Bonaire
Outoridatnan chines a identifiká riba 31 di desèmber 2019 un grupo di persona ku a wòrdu infektá ku e vírùs di corona nobo, 2019-nCoV0 na siudat di Wuhan, China. Despues di esei a haña e vírùs tambe na otro parti di China manera Beijing i Guandong serka hende ku promé ku esei tabata na siudat Wuhan. Tailandia, Hapon, Korea Sur i Estados Unidos tambe a mèldu kaso di e vírùs.
Problema pa hala rosea, kentura i tosamentu ta indikashon ku bo ta haña hopi biaha ora tin infekshon ku vírùs di corona. Den kasonan serio e por resultá den pulmonia, nir ku no ta funshoná mas i por kousa morto.
Ta kalkulá e chèns ku e vírùs ta yega Boneiru masha chikitu. No tin hende ku ta biaha dirèkt entre China i Boneiru. Ku loke ta konosí awor aki, ta parse ku e malesa no ta hopi kontagioso di hende pa hende. Na China no tin masha famia di pashèntnan ku a bira malu. Ta p’esei ta parse awor aki ku e malesa no ta pasa masha fásil di hende pa hende. “World Health Organisation”, WHO, ta tene esaki bon na bista, pasobra ta posibel ku e vírùs ta adaptá su mes. Ta p’esei paisnan ta masha alerto.
WHO ta konsehá biahero pa China pa evitá di pasa na marshe kaminda tin bestia bibu i pa tuma medida di higiena general manera laba man regularmente ku awa i habon, tapa boka i nanishi ora di tosa i evitá kontakto ku hende malu.
Departamento di Salubridat Públiko ta sigui e desaroyonan ku masha atenshon i ta traha en estrecho koperashon ku “Rijks Instituut voor Volksgezondheid en Milieu”, RIVM. Tin deliberashon estrecho tambe ku profeshonal den kuido di salubridat i otro organisashon relevante na Boneiru pa ta prepará i por tuma medida lihé si esei mester. Den kaso ku tin desaroyo relevante nobo, departamento di Salubridat Públiko lo informá komunidat.