Departamento di planificacion di capacidad na CMC ta unicamente planifica e operacionnan

Hunta di directiva di Curaçao Medical Center (CMC) a tuma nota di informacionnan incorecto tocante e departamento di planificacion di capacidad. Den cuadro di esey Hunta di directiva di CMC kier informa nos pashentnan i pueblo di Corsou en general con e proceso di planificacion di operacion ta hinca den otro.

E proceso di planificacion di operacion ta un cooperacion entre e departamento di planificacion di capacidad i e mediconan specialista. E proceso ta hinca den otro na e siguiente manera: e medico ta determina si un pashent ta bini na remarca pa haci un operacion i den cua periodo e pashent lo mester haci e operacion. Na momento cu e medico determina esakinan, e ta pone e departamento di planificacion di capacidad na altura. E departamento ya menciona na su turno ta plania e operacion i no ta determina ken si of ken nota opera.

Actualmente CMC ta confrontando un situacion di scarsedad di personal di sala di operacion. Debi na e situacion aki,solamente 3 pa 4 camber di sala di operacion ta operacional por lo pronto. Den cuadro di esaki, e departamento di planificacion di capacidad ta tuma contacto cu e mediconan pa sa cua pashent lo haya preferencia pa opera. Seguidamente, e medico for di su responsabilidad lo informa e pashent di esaki. Hunta di directiva di CMC ta enfatisa cu tur caso di emergencia ta haya preferencia semper. Departamento di planificacion ta simplemente coordina i facilita esnan cu a wordo selecta pa operacion.

Hunta di directiva di CMC ta sigui haci su maximo esfuerso pa soluciona e problematica di scarsedad di personal di sala di operacion i ta conta cu cooperacion di su pashentnan i comunidad di Corsou den esaki. Segun Hunta di directiva di Curaçao Medical Center (CMC) ta indica den su comunicado.

 Foto CMC