Relaciona cu Dia Internacional di Tratado di Derecho di Mucha:
Na 2001 Aruba a ratifica e Tratado di Derecho di Mucha y esey kiermen cu e ta asumi cierto responsabilidad pa na un forma mas completo posibel pa salvaguardia y proteha e derechonan di mucha mediante di e diferente articulonan cu ta describi den e Tratado.
For di 20 di november 1989 Nacion Uni a bin cu Tratado di Derecho di Mucha. Den e Tratado di Derecho di Mucha tin 54 articulo cu palabracion concreto tocante derecho di mucha y hoben te 18 aña. Tratado di Derecho di Mucha ta un di e Tratadonan di Derecho Humano. E Tratado di Derecho di Mucha ta implementa directamente e definicion di e Declaracion Universal di Derecho Humano riba mucha y ta agrega cu e mucha tin un necesidad di proteccion, cuido special, inclusivo proteccion huridico, tanto prome como despues di nacemento.
Pa duna ehecucion efectivo y eficiente di e Tratado Internacional di Derecho di Mucha como tambe e LV Kinderopvang gobierno a dicidi pa bin cu un entitad den forma di departamento pa menor (mucha y hoben), esta Departamento di Mucha y Hoben (DMH). DMH lo ta na encargo di ehecuta diferente proyecto y trayecto cu ta relaciona cu e areanan menciona, pa salvaguardia e derecho di nos mucha- y hobennan. Departamento di Mucha y Hoben (DMH) a inicia su trayecto for di 2020 y finalmente despues di 2 aña a keda cla oficialmente. A pesar cu pa 2023 DMH lo sigui haci su trabounan ‘budget neutral’.
DMH su vision ta: Cu e mucha- y hobennan, naci y cria na Aruba, ta crece den un ambiente trankilo y pacifico, yena di amor y siguridad, unda nan derechonan, siguridad, proteccion y igualdad di oportunidad di desaroyo como mucha y hoben ta garantisa.
DMH su mision ta: Adkiri conocemento y experticio di e profesionalnan. Aplica e supervision di calidad di maneho nacional y di e leynan relaciona cu e derechonan di mucha y hoben na Aruba. Di e manera aki, ta crea e precondicionnan necesario na Aruba, riba e areanan cu ta relaciona cu siguridad, proteccion y desaroyo saludabel y optimal pa nos mucha- y hobennan desde un edad trempan.
DMH su meta general ta: Duna un caracter structural y sostenibel na e derechonan di mucha y hoben, manera ta estableci den e Tratado Internacional di Derecho di Mucha, door di entre otro, respeta y garantisa e condicion- y comodidadnan dentro di e centronan di cuido preescolar y extraescolar, mehorando e siguridad y proteccion, bienestar general y e oportunidadnan di un bon desaroyo saludabel.
3 Tratado den ehecucion
Un di e prome tratadonan cu a inicia cu ne ta, Articulo 19: Derecho di Proteccion contra abuso/maltrato. Y esaki ta den e forma di Codigo di Proteccion, unda e profesionalnan den 4 sector: Enseñansa, Social, Husticia y Salud ta traha na un forma uniforme, structura y delinea con ta anda cu sospecho di abuso di mucha.
Tambe ta dunando forma y contenido na Articulo 18: Bon educacion y cu gobierno mester percura pa tin centronan di cuido preescolar y extraescolar bon regla, unda ta garantisa siguridad y bienestar general di e muchanan aki.
Y Articulo 23, mucha cu disabilidad. Aki ta trahando pa desaroya henter un sistema di intervencion trempan pa e muchanan di 0-4 aña cu ta bishitando un centro di cuido di mucha.
Pues di e forma aki Departamento di Mucha y Hoben (DMH) lo sigui traha hunto cu diferente stakeholders riba diferente proyecto y trayecto, cu e meta final y holistico di bienestar general, proteccion, siguridad y desaroyo optimal y saludabel di nos mucha- y hobennan na Aruba.
