Recientemente a tuma luga e ultimo dia di estudio pa cabesante- y maestronan di klas 1 di scol
basico.
DEA den consulta cu e directivanan di scol a inicia cu un trayecto di preparacion pa cabesante- y
nan maestronan di klas 1 di scol basico na november 2023. E promer sesion informativo a
cuminsa dia 17 di november 2023 na unda a comparti informacion, a conecta cu otro y a crea
diferente Comunidad Profesional di Siñamento (CPS). En total a forma ocho CPS na unda cada
CPS lo enfoca riba un of mas topico pa profundisa nan mes aden. Cada CPS por a enfoca riba
diferente area specifico cu ta interesa e grupo nucleo di e CPS.
E cabesante- y maestronan di klas 1 a bin hunto dia 19 di januari, 16 di februari, 27 di maart, 19
di april y 31 di mei 2024, pa hunto prepara debidamente pa e introduccion di siña lesa y skirbi na
Papiamento den klas 1 na augustus 2024. Cada dia di estudio a tuma luga bou guia di
Departamento di Enseñansa Aruba (DEA) conhuntamente cu Centro di Desaroyo Profesional
Continuo (CDPC) di Instituto Pedagogico Arubano (IPA).
Cada reunion a cuminsa cu un momento general unda a comparti informacion general pa esnan
presente, sigui pa tayernan informativo pa e maestronan di klas 1 y pa finalisa e dia a sigui traha
riba e topico di e Comunidad Profesional di Siñamento (CPS). Cabesantenan a participa na
tayernan dirigi specificamente pa nan, na unda a comparti informacion y sosten pa asina apoya
nan den nan papel pa sostene y motiva e maestronan y e team di nan scol.
Cada CPS a presenta nan producto final na nan coleganan y Directiva di scol durante e ultimo
dia di estudio riba 31 di mei. Di e manera aki e gruponan colectivo a yuda sostene otro den e
preparacion di e implementacion di e maneho nobo di idioma na unda ta siña lesa y skribi na
Papiamento. E gruponan a profundisa nan mes den e materia na unda algun grupo a presenta
nan observacion nan, otro a presenta material cu nan a adapta, y otro a traha material
completamente nobo. Na e manera aki e gruponan a acopla bunita na otro.
Mester menciona cu durante e dia aki Minister di Enseñansa, sr. Endy Croes tambe tawata
presente pa presencia e productonan final y a te hasta haya su mes inesperadamente ta forma
parti di un di e presentacionnan.
DEA ta hopi agradecido pa e sosten ricibi di tur e cabesante- y maestronan y Directiva di e scolnan
y alabes DEA kier a yama Minister di Enseñansa danki pa su presencia durante e mainta aki.
Pa mas informacion relaciona cu Enseñansa na Aruba por acudi na nos website www.ea.aw.
Tambe por sigui nos den social media via nos facebook y instagram pages @educationaruba pa
keda na altura di tur informacion.
