Otro siman lo mester reuni cu Parlamento pa sa nan desicion
Diabierna 20 di mei, Prome Minister Evelyn Wever-Croes a anuncia cu despues di hopi negociacion, Ministerraad na Hulanda diabierna mainta a bay di acuerdo pa stop e recorte di 5% cu tin tur luna riba salario di empleado publico y semi-publico entrante juli 2022 y pa kita ful e 12.6% na 2023.
Mirando cu e decision aki ta bin cu cierto condicionnan, Prome Minister a dirigi un carta na Parlamento pa informa nan di e decision y pa e por tin un bista di kico ta e pensamento di Parlamento tocante esaki.
E tres condicionnan ta lo siguiente;
Pago di 5% mester ta den Aruba su presupuesto
E prome condicion pa cu eliminacion di e recorte di 5% ta cu e placa aki mester ta den presupuesto di pais Aruba ya cu Hulanda no lo presta Aruba e placa aki. Como cu esaki tabata un vision di Gabinete Wever-Croes pa cu e aña aki, a tene cuenta cu esaki y a inclui e placa destina pa paga empleadonan publico den Presupuesto 2022.
Politiconan mester sigui cu e recorte di 25%
E di dos condicion ta cu e politiconan mester sigui cu nan recorte di 25%. Pa Gabinete Wever-Croes II, pueblo di Aruba ta na prome luga y p’esey a tuma e decision den Ministerraad pa continua e recorte di salario di e ministernan pa asina empleadonan publico y semi publico por haya nan placa bek. Hulanda a pidi pa Parlamentarionan tambe sigui contribui cu nan recorte y basa riba e peticion aki, Prome Minister a pidi un reunion cu Parlamento pa asina mira kico nan decision lo ta pa cu e peticion aki.
Ley Wever-Croes norm mester wordo pasa
E di tres condicion ta cu e ley di Wever-Croes Norm mester wordo pasa. E ley aki actualmente ta na Parlamento. Prome Minister lo reuni cu Parlamento pa asina tin un bista pa ki tempo Parlamento lo trata e ley aki asina cumpliendo cu exigencianan d Hulanda. Parlamento a manda un invitacion pa un reunion probablemente pa dialuna awor pa asina por trata e temanan aki abiertamente.
Prome Minister a indica cu otro siman e decision di Ministerraad na Hulanda lo bay Rijksministerraad na unda lo tin 3 gevolmachtigde minister hunto cu e 20 ministernan cu tabata den e reunion diabierna mainta. Mirando cu e 20 ministernan a bay di acuerdo caba cu e decision aki, y cu un di e 3 gevolmachtigde minister ta di Aruba, e probablidad cu esaki lo wordo nenga ta minimo. Prome Minister a expresa di tin tur confiansa cu e decision di Rijksministerraad lo ta uno positivo pa asina Aruba por logra duna su empleadonan publico y semi-publico nan placa bek.
“Aworaki nos ta trahando riba e ehecucion pa asina nos por cumpli pa dia 1 di juli regla den e payroll pa fin di juli ora tur e empleadonan publico cobra, nan ta mira un aumento den nan salario di 5% y cu poder di Dios pa otro aña ful e 12.6% lo wordo elimina,” Prome Minister a duna di conoce.
