ORANJESTAD, Aruba
Gobierno a anuncia aumento di pashentnan cu a test positivo pa coronavirus y na mesun momento a anuncia algun otro medica cu a keda tuma.
Despues cu a casonana subi na 9 den fin di siman, awe a anuncia cu tin tres caso nobo cu a bini acerca. Ta trata di un persona cu a yega recientemente for di Colombia mientras cu e otro dosnan ta di contagio cu a tuma luga localmente. Pues e cantidad di casonan ta total 12, di cual uno a bay Merca. Nan ta den bon estado di salud y a mustra sintomanan leve.
A splica cu ultimo dianan a bira mas agresivo den testmento, unda cu ta invitando mas hende pa bin test pa trata di contene e contagion di un miho forma.
Mirando cu e virus a cuminsa plama bou di e población, a dicidi di tuma algun medida adicional. Entrante mayan 24 di maart ta cera tur bar y restaurant. Nan por ta habri solamente pa take-out, delivery y driv-thru. Horario di cierre pa tur negoshi ta bira 8’or pa permiti tur empleado yega nan cas pa 9’or di anochi ora cu e toque de queda ta cuminsa.
Aunke ta aumenta e nivel di precaucion, no mester drenta den panico. E mester preocupa tuma hende pa contene e esaki y tuma medidanan necesario. Ta bisa bou di control pasobra no a interna ningun hende y e pashentnan ta entre 22 y 67 aña.
E mandatario a invita mas hende pa haci e testnan pa evita contagio.
Tambe a keda anuncia cu Gobierno ta organisando vuelo charter pa trece Arubianonan cu a keda pega den exterior. ATA tin un lista di 227 persona, di cual mayoria ta na Colombia. Esnan na Merca of Hulanda ya caba a regla nan biahe pa Aruba.
Pa esnan di Colombia a prepara tres vuelo charter for di Medellin, Barranquilla y Bogota. E dos prome vuelonan ta diaranson mainta for di Medellin y atardi for di Barranquilla mientras cu riba diahuebs mainta tin esun for di Bogota.
A adverti cu mayan ta e ultimo dia cu por biaha entre ciudadnan pa yega na e punto di salida di e tres vuelonan charter. ATA ta den contacto cu e personanan pa informa nan di kico nan mester haci pa logra yega na tempo pa subi un di e vuelonan menciona, Riba cada un di e vuelonan tin rond di 50 asiento, pues suficiente pa tur hende.
Fiscal Pronk di Ministerio Publico a anuncia cu tabatin 41 detencion den e di dos dia di toque de queda y a parti boet na tur, mientras cu tabatin un persona recidivista. Hasta muchanan menor di edad a haya boet. El a splica cu si para un auto, y tin persona riba 12 aña, cada un ta haya un boet separa.
Tambe a informa cu a haci un cambio den e decreto di toque de queda cu ta nifica cu ciudadanonan no por ta den nan cura di cas cu ta pega riba caya durante ora di toque de queda. Por keda riba veranda of patras di cas pero no riba e parti cu ta pega cu caya grandi. Esaki ta drenta na vigor awe mey anochi.
![Den Toque De Queda No Ta Permiti Persona Riba Su Propiedad Dilanti Cu Ta Pega Riba Caminda Publico 155 Download 2](https://www.earubianonews.com/wp-content/uploads/2020/03/download-2.png)