ORANJESTAD,Aruba
Pa casi tres aña largo, Prome Minister Evelyn Wever Croes a bin ta haciendo su maximo esfuerso pa brinda pueblo un porvenir di seguridad y prosperidad, confrontando retonan grandi, algun anticipa y otronan totalmente inespera.
E lucha pa drecha finansa di e pais tabata e prome reto cu el a asumi, introduciendo medidanan cu no tur ora tabata na agrado di tur hende pero cu tabata necesario pa saca e pais dilanti.
Tambe Prome Minister Evelyn a wordo enfrenta cu un relacion cu Hulanda cu no tabata un di e miho nan, trahando duro pa drecha e relacionnan den Reino, percurando pa Aruba su lazo cu Hulanda, por a bira e miho cu a yega di conoce.
Otro reto grandi tabata e debe nacional grandi cu su gobierno a hereda, buscando e miho forma pa yega na solucionnan adecuado sin cu a perhudica pueblo, sin cu a kita for di pueblo pero e retonan grandi aki, a rekeri sacrificio di tur envolvi.
Un di e luchanan mas grandi den e ultimo tres añanan di gobernacion, a bira e insistencia di Hulanda pa nos pais atende soluciona e situacion financiero y pa cual Hulanda a insisti pa cambionan fuerte a cambio di yuda Aruba haya prestamo cu interes abou riba mercado internacional.
E insistencia for di Den Haag pa cambia e situacion financiero di e pais, a trece ainda mas reto grandi, caminda for di Den Haag tabata facil pa papia di tuma mas medida, facil pa bisa cu tin cu manda hende cas pero caminda en realidad esaki lo tabata e solucion adecuado.
Prome Minister Evelyn Wever Croes a wordo confronta cu exigencianan di Hulanda cu no tur ora tabata cuadra den su plan pa alivia e presion financiero di su gobierno y esun di pueblo, caminda cierto palabracionnan a rekeri mas tempo pa wordo implementa cu otronan.
Sinembargo demostrando un seriedad solido, un determinacion nunca bisto, Eveln Wever Croes semper a gana e respet di Hulanda pa yega na solucionnan cu tabata na beneficio di nos pais.
Mester a introduci e di dos parti di un reforma fiscal nobo pero dor di cierto desaroyonan cu a tuma luga, esaki a bira casi imposibel pa introduci na e momento preciso y necesario, cual situacion tambe a haya tur atencion y esfuerso di Prome Minister.
Den aña 2020 a surgi e pandemia cu a afecta henter mundo, paisnan grandi y chikito caminda Aruba tampoco a scapa for di dje y cu a rekeri medidanan estricto di parti di Prome Minister y su gobierno, pero cu a conduci na evita cu e crisis aki lo a bira algo mucho mas serio di loke el a resulta.
Sinembargo e medidanan di prevencion aki a resulta tambe den un debate financiero y economico, mescos cu tur otro pais grandi y chikito pero para den centro di e situacion dificil aki, Prome Minister Evelyn Wever Croes a sobre sali tur dia, buscando solucion y proteccion pa pueblo di Aruba.
Su presentacion practicamente tur anochi durante di e crisis aki, dirigiendo su mes na su pueblo, Evelyn a trankilisa henter e pueblo, a brinda nan confiansa cu cosnan lo cambia y cu Aruba lo bolbe sali padilanti y cu pueblo lo conoce e caminda di recuperacion bek.
Sinembargo e di dos etapa di e pandemia tambe a afecta Aruba y un biaha mas Prome Minister a demostra su caracter unico, ta sobresali den e proceso aki pa proteha tur hende pero cu e reto grandi di trata di limita e influencia negativo pa e situacion economico di e pais.
Prome Minister y su gobierno a tuma riesgonan delicado pa duna inicio na e recuperacon economico cual ta bayendo den e bon direccion pero na tur momento pidiendo su pueblo pa tur hende duna nan comperacion pa asina limita e plamamento di e corona virus.
Sin duda a base di e reaccionnan sumamente positivo for di den pueblo, por confirma cu Prome Minister Evelyn Wever Croes a bira e bos di pas den tempo turbulento, e bos di speransa den temponan dificil y e bos cu lo saca e pais dilanti un biaha mas.
E retonan cu Hulanda ta sigui ainda, caminda buscando un solucion adecuado na bienestar di e hende e pais, Prome Minister ta tratando na cumpli cu Hulanda pa haya e di tres parti di un fiansa grandi pa saca nos pais dilanti.
Cu su curashi ya demostra, cu su capacidad di lider confirma, pueblo por ta sigura cu Prome Minister Evelyn Wever Croes lo saca nos pais dilanti y trece bek prosperidad y trankilidad.