ORANJESTAD, Aruba
En conexion cu e situacion actual di Corona Virus (Covid-19) y e medidanan di “social distancing” y prevencion pa contene e virus aki, Seccion Bida y Famia di Departamento di Asunto Social (DAS) kier informa comunidad di Aruba cu ta sigui brinda servicio y sosten psicologico via contacto telefonico.
Den e momentonan di crisis aki, hopi di nos por cuminsa sinti tension, stress, anshamento pa tur locual cu ta sosode rond di nos, pa motibo di medidanan di proteccion pa contene e contagio di e virus Covid-19. E tension y stress aki por wordo ocaciona door di cambio den entre otro; situacion financiero, a perde trabou, falta di cuminda na cas, falta di guia y sosten na yiunan, violencia domestico, tin familiar cu a bira malo of tin problema den famia y hopi otro cricumstancianan mas cu ta crea preocupacion.
Tur e cambionan aki den un situacion di crisis por trece cu ne hopi problema y preocupacion entre miembronan di famia. Seccion Bida y Famia di DAS ta na altura di e circumstancianan aki y kier informa comunidad di Aruba y esnan cu ta pasando den un tipo di crisis den famia, cu nos tey pa sirbi nos hendenan y duna e sosten psicologico cu nan tin mester aunke cu ta via telefon.
Pa conseho y sosten por acudi na nos liña directo di servicio na 5281150 entre 8:00am pa 12:00pm y 1:00pm pa 4:30pm
Departamento di Asunto Social lo sigui haci anuncio oficial asina cu bin cambio den circumstancia y medida di proteccion contra Covid-19. Por sigui tur anuncio via nos pagina di Facebook.
