Tourism Corporation Bonaire ta informá
Den luna di yüli 2023 Boneiru a yama bon biní na 14.097 turista stayover, loke ta ilustrá e resiliensia i popularidat kresiente di e sektor turístiko di nos isla.
Boneiru a yama bon biní na 14.133 turista stayover na luna di yüli aña pasá (2022) i den komparashon ku e nivelnan di promé ku e pandemia na luna di yüli 2019 ku 13.000 bishitante. E sifranan aktual ta indiká un oumento remarkabel di 8% den e kantidat di bishitante, loke ta reflehá e kresementu kontinuo i ekilibrá i e atraktividat di Boneiru komo un destinashon ekselente di biahe.
E dos merkadonan mas importante di prosedensia pa turismo na Boneiru ta keda Hulanda i Merka. Bishitantenan hulandes a representá 6771 (48%) di e kantidat total di bishitante, miéntras Merka na luna di yüli 2023 a kontribuí ku 3488 (25%) bishitante stayover. Banda di esaki tabatin un oumento remarkabel di e kantidat di bishitante ku a bini pa promé biaha, esta 43% di e kantidat total di yegada den e luna ei.
Kòrsou ta sigui duna un aporte esensial na Boneiru su turismo, ku 2127 (15,1%) bishitante ku a bini for di nos isla bisiña. Otro merkadonan importante ta Bélgika, Aruba, Alemania, Canada, Suisa, Brasil i Colombia. Den luna di yüli 2023 Alemania a bini dilanti komo un merkado fuerte, ku 238 bishitante stayover registrá. Komo konsekuensia di esaki luna pasá Alemania a sigurá su mes di e di kuater puesto riba e lista di merkadonan ku ta presta mas mihó.
Pa loke ta trata demografia, mayoria di e bishitantenan ta kai den kategoria di edat di 45 pa 54 aña, loke ta indiká ku nos isla ta atraktivo pa biaheronan adulto ku ta en buska di eksperensianan diverso. Si nos wak merkado merikano, Texas, Californië, Florida, Colorado, Pennsylvania, New York, Georgia, Virginia, North Carolina i New Jersey ta e estadonan tòp for di kua nos bishitantenan ta bini. Pa loke ta trata bishitantenan hulandes, e regionnan mas importante di prosedensia tabata e parti nort i sùit di Hulanda, ku Noord-Brabant komo e provinsia for di kua mas tantu bishitante ta bini.
Na luna di yüni 2023, 16.442 turista krusero a bishitá nos isla, i kuater kompania krusero a trese nan akí.
Pa estadístika i informashon mas detayá, bai riba www.bonaireisland.com òf tuma kontakto ku nos via info@bonairisland.com.