Prestashon turístiko mensual di Boneiru
Tourism Corporation Bonaire (TCB) ta raportá un total di 10.695 turista ‘stay over’ pa luna di sèptèmber 2022, loke ta enserá un oumento di mas òf ménos 7% di e yegadanan pre-pandémiko, segun sifranan di CBS di 10.000 turista ‘stay over’ den luna di sèptèmber 2019. E merkado oropeo a presta mas mihó ku tur otro kantidat registrá di bishitante. Boneiru a registrá un prestashon positivo di su tòp dos merkadonan mas importante. Boneiru a yama bon biní na en total 5266 (49%) bishitante hulandes i en total 2190 (20%) bishitante for di Nortamérika. Boneiru a mira tambe un punto kulminante den e kantidat di yegada for di e isla besiña Kòrsou, un total di 1708 loke ta 16% di e kantidat total di yegada. E punto kulminante akí ta un konsekuensia direkto di diferente evento ku a tuma lugá riba nos isla, manera Dia di Boneiru, Bonaire Bikers Week i Bonaire Music Festival.
Diariamente TCB ta monitoriá Boneiru su prestashon turístiko i ta kompará, meskos ku otronan den region, su KPI-nan (indikadónan krítiko di prestashon) ku e sifranan pre-pandémiko. Aña 2019 tabata un di e añanan ku mihó prestashon pa Boneiru i aktualmente TCB ta us’é komo ‘baseline/benchmark’ (punto di referensia) pa midi Boneiru su rekuperashon turístiko.
Mas aleu Boneiru a midi un durashon promedio di estadia pa merkado hulandes di 14 anochi i 7 anochi pa merkado merikano. Banda di esei e grupo di edat dominante di tur nos bishitantenan ta varia entre 46 i 65 aña. Den luna di ougùstùs 2022 Boneiru a yama bon biní na 2 barku krusero ku en total 7695 pasahero.
Pa mas informashon i estadístika adishonal, bai na www.bonaireisland.com òf tuma kontakto ku nos via info@bonaireisland.com.
