Den luna di mei, Tourism Corporation Bonaire (TCB) den kolaborashon ku Diamond Public Relations a risibí varios ‘Influencer’, ‘Bloggers’ i prensa internashonal na Boneiru. Tambe e tim di Diamond Public Relations a bishitá Boneiru pa promé biaha, despues di 8 luna ku a anunsiá e kolaborashon entre Diamond Public Relations i TCB.
Den e di 3 siman di mei, TCB den kolaborashon ku Diamond Public Relations Oropa a risibí Instagram ‘Influencer’ Jenna de Vries na Boneiru. Jenna tin mas ku 51 mil siguidó riba Instagram i e ta konosí pa su fotografia bunita riba su kuenta di Instagram ‘JennaSilver_’. Un gran parti di su siguidónan ta establesé na Merka i Oropa. Durante di su estadia na Boneiru, Jenna a partisipá na diferente aktividatnan ku nos isla tin pa ofresé, manera eksplora algun kueba, bishitá nos parke nashonal i tambe kore i landa ku kabai na Lac Bay. Jenna a saka potretnan sorprendente hasiendo e diferente aktividatnan. Ademas di ta un Instagram ‘Influencer’, Jenna ta un ‘Blogger’ tambe i lo skirbi di su eksperensia na Boneiru riba e website www.jennasilver.com.
Den e di 3 siman di mei, a risibí tambe dos ‘Bloggers’ di Bèlgika na Boneiru. Jens De Maere ta un ‘Blogger’ di Bèlgika spesialisá den e mundu kulinario i tin un ‘blog’ riba e website www.belgianwino.com. Yannick De Pauw tambe ta un ‘Blogger’ di Bèlgika spesialisá den biahe rònt mundu. Yannick a risibí un rekonosementu pa su ‘blog’ riba e website www.somsookheimwee.com, enfokando riba sostenibilidat di e destinashon, eksperensianan aventuroso i tambe fotografia ekstraordinario. Durante di nan estadia, Jens i Yannick a partisipá na varios aktividat, manera un Jeep Safari tur den nos parke nashonal i tambe un tur kulinario na diferente restorant i truk’i kuminda. Sigui Jens i Yannick riba Instagram, ‘belgianwino’ i ‘somsookheimwee’, pa mira tur e diferente potretnan di aktividatnan ku nan a eksperensia durante di nan estadia na Boneiru.
Tambe den e di 3 siman di mei, TCB huntu ku Diamond Public Relations Oropa den kolaborashon ku KLM a risibí dos ‘Bloggers’ di Polonia na Boneiru. Ewa Chojnowaska-Lesiak i Martyna Chomacka tin un ‘blog’ riba e website www.szpilkiwplecaku.pl, ku a sali den e tòp 10 ‘blogs’ na Polonia, ku mas di 16 mil lesadó pa luna. Durante di nan estadia na Boneiru, Ewa i Martyna a saka varios potret na diferente aria turístiko i
tambe a traha varios ‘stories’ riba nan kuenta di Instagram ‘szpilkiwplecaku’. E kolaborashon entre TCB, Diamond Public Relations Oropa i KLM, ta pa motibu ku e aerolinia ta mira un gran potensial den e merkado di Polonia komo un merkado Oropeo nobo pa e islanan den Karibe inklui Boneiru.
Den e lastu siman di mei, TCB tabatin e gran oportunidat pa risibí e tim di Diamond Public Relations di Merka i di Oropa na Boneiru. Na november 2020, TCB a anunsiá su kolaborashon ku Diamond Public Relations i despues di 8 luna, e tim di Diamond Public Relations a haña e oportunidat pa bishitá nos isla. Durante di nan estadia, nan a sera konosí personalmente ku diferente partner lokal i tambe nan a bishitá varios akomodashon luhoso, hotelnan, restorantnan i otro aktividatnan. Alabes, e tim di Diamond Public Relations di Merka den kolaborashon ku TCB a risibí dos prensa Merikano, durante di nan estadia na Boneiru. Alison Fox ta un eskritor pa TravelandLeisure.com, kual ta un di e plataformanan online mas grandi na Merka, ku mas ku 3 mion bishitante pa luna. Eric Barton ta un prensa independiente ku a bin bishitá Boneiru pa skirbi un artíkulo pa Explore Florida & The Caribbean, kual ta un publikashon online, enfokando riba guia turístiko. Tur dos prensa a bishitá Boneiru pa promé biaha i a keda enkantá ku e isla i lokual ku e isla tin pa ofresé na turista. Tur dos prensa lo skirbi un artíkulo abase di nan eksperensia na Boneiru.
Pa luna di yüni, TCB i Diamond Public Relations Oropa i Merka lo sigui risibí prensa di gran importansia manera Duiken Magazine, Duiken.nl, National Geographic Traveler Nederland, De Telegraaf, Margriet Magazine i tambe Cosmopolitan Magazine.
TCB ta yama danki na tur partner ku a kolaborá mustrando lokual ku nan tin pa ofresé i ku a partisipá pa hasi e eksperensia di kada un ‘Influencer’, prensa i e tim di Diamond Public Relations na Boneiru, unu inolvidabel.
1 comment