Den luna di April ta conoci pa ta temporada di campamento. Departamento di salud ta pidi nos comunidad pa tene cuenta cu cuido di nos salud durante campamento. Solo fuerte, consumo di alcohol excesivo y relacion sexual sin proteccion ta algun di e cosnan cu nos mester preveni pa no tin consequencianan negative ariba nos salud.
Solo fuerte
Aruba su clima ta uno sumamente calor. Pa proteccion contra di solo fuerte percura pa haci uzo di Sunblock cu ta contene un minimo di 30 SPF cu UVA y proteccion di UVB. Aplica y reaplica sunblock cada 2 ora. Pa muchanan ta conseha pa reaplica cada mei ora. Crea sombra dor di proteha bo mes cu pechi of sombre. Proteha bo cuero dor di bisti paña den colornan cla. Bisti bril pa proteha bo wowo di rayonan ultravioleta fuerte.
Consumo excesivo di Alcohol
Nos ta na altura cu durante campamento hopi ta abusa di e uzo di alcohol y pa es motibo Departamento di Salud Publico ta desea di conscientisa Aruba su comunidad ariba e peliger cu consume alcohol ta trece cune. Campamento ta dushi y hopi biaha bo ta rondona cu famia y amistad den un seno cu ta inclui consumo di alcohol. Sinembargo, ta hopi importante pa recorda cu bebemento excesivo por tin consequencianan serio manera, accidenta cu vehiculo di motor, lesiona bo mes of otronan y te hasta causa morto. Alcohol tin influencia riba bo coordinacion, bo conocemento, bo balans y bo abilidad pa pensa racional y cu claridad. Alcohol ta hacibo mas impulsivo y ta pone cu bo kier surpasa limitenan. Corda cu alcohol tambe ta un risico factor pa cu malesanan chronico.
Pace bo mes, disfruta pero no abusa! Con pa pace bo mes?
Bebe un glas di awa pa cada bebida alcoholico cu bo dal. Si bo ta bebe alcohol percura pa bo come snacks regularmente of come por lo menos cada ora. No bebe dimas. Dal maximo un glas di bebida alcoholico pa ora. Si bo no a tuma e precaucionnan necesario y ta sinti cu bo no por maneha, pidi un persona cu no ta bou di influencia pa maneha pabo of hibabo cas.
Kico bo por haci pa keda disfruta di un campamento sano?
- Limita bo consumo di Alcohol
- Bebe sufciente awa pa keda hidrata
- Come snacks saludabel durante dia
- No maneha vehiculo di motor bou di influencia di alcohol
- Aplica suficiente sunblock
- Haci uzo di pañanan y accesorionan cu ta yudabo crea sombra
Bishita nos pagina di Facebook of Instagram: Directie volksgezondheid Aruba pa mantene bo mes informa of bishita nos website www.dvg.aw