Parlamentario mr. Mc William di frakshon di MAN riba dia Mundial di Kanser a bishitá Fundashon Prevenshon ku ya pa mas ku 10 aña ta kontribuí na kombatimentu di diferente forma di kanser aki na Kòrsou. Parlamentario mr. Mc William a tuma nota ku banda di e programanan eksitoso di prevenshon di kanser na pechu i matris awor tambe esun di kanser di tripa a inisiá. FP ya a realisá tèst ku éksito di 400 hende muhé/hende hòmber ku a keda di tèst pa ku kanser di tripa di kual ta un di e malesanan ku mas ta manifestá su mes aki na Kòrsou.
Sra. Elstak direktora di FP a duna Parlamentario mr. Mc William un splikashon i rekorido di e unidat aki di prevenshon di kanser di tripa ku ta “state of the art” pa loke ta trata e ekiponan diagnóstiko i prosedura ku ta keda usa pa prevení kanser na tripa. Banda di esaki sra.Elstak a duna di konosé e bunita trabou di kolaborashon ku FP Kòrsou tin ku Aruba unda aki na Kòrsou diariamente radiólogo lokal ta analisá pa dia 50 potrèt radiológiko di pashèntnan ku posibel kanser na pechu di Aruba.
Ku hopi orguyo nos por mira Fundashon Prevenshon ta sigui aportá na prevenshon di kanser manera kanser na pechu,tripa i matris. Fundashon Prevenshon ta e partner di Gobièrnu pa sigui yuda kombatí e malesa aki den nos poblashon.
Di e manera aki sigui traha un sentro di prevenshon pa nos hendenan i pa Karibe ku tur ingrediente pa por krea Turismo di prevenshon i krea otro pilar ekonómiko pa Kòrsou.
