KRALENDIJK, Aruba
Komishon pa Kondekorashon Real ta trahando riba dokumentunan pa propone algun siudadano pa bini na remarke pa un Kondekorashon Real pa loke ta trata aña 2021. Tur aña miembronan di e komishon mes ta sondia pa di tal manera Boneiru su abitantenan tambe ta riba e lista di personanan ku ta haña un Kondekorashon Real.
Hendenan ku ta hasi trabounan eksepshonal den nos komunidat no ta opvio ku ta pensa riba nan. Ta p’esei ta hopi esensial pa kada un di nos pone atenshon riba kiko kada ken ta hasi den e komunidat aki. Tur kaminda riba nos dushi Boneiru tin personanan ku ta duna di nan mes pa komunidat.
Mayoria biaha nan ta hasi esaki den un forma ku no ta visibel pa otro hende. Lo ta bon si nos por pone e hendenan aki den spòtlait. Bo konosé un hende asina, i bo ta haña ku e meresé un rekonosementu públiko? E rekonosimentu mas balioso ta un kondekorashon di reino.
Un kondekorashon ta un símbolo di rekonosementu na un persona pa su aporte personal, òf algu ekstraordinario pa komunidat.
Tur hende por proponé un kandidato ku por bini na remarke pa un kondekorashon real. Pa manda un nòmber aden mester yena un formulario i motivá dikon e persona lo mester bini na remarke pa e haña un kondekorashon. Ta yena un formulario ku e motivashon i tambe informashon di e persona i ta duna referensia. E petishon aki ta drenta serka e komishon di kondekorashon ku ta konsistí di Lucia Anthony, Jeaninne Wong Loi Sing, Mary Tjin Asjoe i Meralda de Palm. Nan ta kaba di prepará e dokumentonan i hasi un promé sondeo pa wak si e petishon ta kumpli ku loke tin preskribí.
Na momento ku esaki ta kla ta entregá e proposishonnan na gezaghèber ku ta duna un konseho. Si e konseho ta positivo por duna un proposishon pa e sorto di altura di kondekorashon. Finalmente e representante di reino ta duna un kontesta final. E petishonnan ku e representante di reino risibí ta bai pa un komishon di 5 persona ku ta independiente (Kapittel voor de Civiele Orden) ku ta bai wak si e proposishon ta kumpli ku e reglamentu di òrdu i e ta duna minister un konseho.
Esun ku ta manda un proposishon aden mester tin pasenshi. E por dura un par di luna promé ku e ta kla. Ta importante pa entregá e informashon na tempu pa asina por prosesá e informashon na tempu. Pa promé di sèptèmber e proposishonnan mester ta den man di gezaghèber. P’esei ta importante pa entregá e petishonnan no mas tarda ku fin di yüli 2020 asina entidat públiko tambe por pidi informashon adishonal ku nan tin mester manera e papel di bon kondukta.
Ki ora un persona ta bin na remarke pa un kondekorashon? Si un persona ta hasi trabou boluntario kaminda su meta ta por ehèmpel laga e otro sintié bon. Si tin aporte personal òf spesial pa e komunidat. Esei por ta den trabou boluntario pero tambe den trabou pagá. Voluntarionan ku pa 15 aña òf mas a duna un aporte inkansabel na un organisashon riba tereno di por ehèmpel deporte, kultura, arte, bida religioso, naturalesa, órden públiko, ta algun ehèmpel ku por hañá un kondekorashon.
Un persona ku a hasi algu ekstraordinario den su trabou, tambe lo por bini na remarke pa un kondekorashon. Importante ta ku komunidat mester a benefisiá di e trabou ku e hende a hasi. Pues e no mester ta relevante solamente pa e organisashon kaminda e kandidato ta traha, pero pa komunidat tambe.
Bo sa di un persona ku bo ke proponé pa un kondekorashon? Pa mas informashon por tuma kontakto ku sra. Jeaninne Wong Loi Sing na 786 8549, sra Mary Tjin Asjoe na 527 3292, sra Meralda de Palm na 511 1029 òf sra. Lucia Anthony na 786 1956 òf por manda mail na un di e siguiente miembronan: jwongloising@gmail.com; lucia.anthony@bonairegov.com; marytjindirectie.sz@gmail.com i meralda.depalm@bonairegov.com