KRALENDIJK,Bonaire
Antisipando riba implementashon di un prohibishon riba uso di plèstik desechabel Kolegio Ehekutivo a regalá tur empleado públiko di Entidat Públiko Boneiru un bòter di awa reusabel. ‘Nos ta haña ku ta algu masha normal pa ora nos ta riba kaminda òf nos ta bayendo bich pa den purá pasa kumpra un bòter di awa i tir’é afó ora e ta bashí. Na Boneiru so kaba ta trata di shéntos di míles di bòter i hopi mas si nos konta esunnan di e turistanan tambe aserka. Esei ta un seru grandísimo di bòter’, segun diputado James Kroon. Diputado Kroon a palabrá ku minister Stientje van Veldhoven ku dentro di dos aña Boneiru ta implementá un prohibishon riba plèstik ku ta destiná pa usa un biaha so. Adelantando riba esei Kolegio Ehekutivo ya kaba ke deskurashá uso di plèstik desechabel mas tantu posibel. Entre otro pa medio di hasi nos hendenan konsiente di e echo ku tin alternativa, manera bòter di awa ku por yena di nobo. Por sierto awa di kranchi na Boneiru ta di un kalidat ekselente.
Komo gobièrnu ke duna un bon ehèmpel, Kolegio Ehekutivo a añadí un bòter di awa reusabel na e pakete di Pasku tradishonal ku resientemente e empleadonan públiko a risibí. ‘Nos ta spera ku otro doñonan di trabou tambe ta regalá nan trahadónan un bòter di awa reusabel. Di e manera ei huntu nos por pone un promé paso signifikativo pa hasi e seru di plèstik asina grandi ei bastante mas chikitu i asina konfirmá nos imágen komo isla limpi’, segun diputado Kroon.
