Den e ultimo lunanan aki e partidonan di oposicion, esta AVP, MAS y Accion constantemente ta fulmina y instigia pueblo contra Gabinete Wever-Croes creando e storia cu MEP no tin e habilidad pa goberna e pais aki den tempo di crisis. Sinembargo historia ta demostra cu cada biaha cu MEP a drenta gobierno, MEP a haya un situacion financiero y social pesimo laga atras pa e gobiernonan di AVP, pero cada biaha e gobiernonan di MEP a sa di maneha e situacion den forma responsabel, enfrenta e retonan y trece solucion concreto pa cu tur e problemanan aki.
Gobernacion di MEP, 1989-1994
Na 1989 Gabinete Oduber 1 a encontra un situacion desastroso caminda na januari 1988 e gobierno di Henny Eman a firma cu Schotte BV pa corta e refineria Lago na pida pida y bende e restonan como hero bieu, pero tabata danki na intervencion di Premier Nelson Oduber cu a para e cortamento aki, a busca un operador nobo y finalmente a percura pa e reapertura cu e compania Coastal Refinery na april 1991 y cual refineria a keda habri te 2012.
Alabes na 1989 e gobierno di MEP a ser confronta cu 3 hotel den ruina (Beta, Ramada y Plantation) laga atras pa Gabinete Henny Eman caminda Mafia Italiano tabata envolucra den tur e bagamunderianan aki. Pero hunto cu Hulanda e gobierno di MEP a percura pa trece solucion pa tur e 3 hotelnan den ruina aki. Cu awe nos ta mira e cadenanan prestigioso manera Marriott y Divi Phoenix completamente activo, esey ta danki na e vision y curashi di Nel Oduber y MEP.
Gobernacion di MEP, 2001-2009
Na 2001 partido MEP a bolbe drenta gobierno despues di tabata 7 aña den oposicion. Aki nos partido a ser confronta cu debenan astronomico laga atras pa Gabinete Henny Eman. Debenan di proyectonan spirito cu nunca a ser realisa of cu ta yena di corupcion: SACE, Fondo Desaroyo San Nicolas, Race Track, Radar, Radisson, Winston & Strawn, Trias, Fuentes, Bushiri, AZV y CSS. Den total ta papia aki di debenan di mas di 800 miyon florin cu e gobierno di MEP mester a paga pa tur e bagamunderianan di AVP. E debe di mas grandi tabata esun di e garantianan di SACE cu tabata 206 miyon dollar. Tabata danki na Nel Oduber y Nilo Swaen cu a bay te Italia y a logra un reduccion di 100 miyon dollar di e debe gigantesco aki.
Alabes e gobierno di MEP a encontra varios crisis mundial na 2001 y e añanan siguiente, manera e crisis di 9/11, e guera di Irak y su conesecuencianan, SARS, Nathalee Holloway, crisis financiero mundial na 2008/2009. Asina mes den tur e crisisnan aki e gobierno di MEP a logra aumenta e cantidad di turistanan for di 691 mil na 2001 te cu 810 mil na 2009. Un logro sumamente impresionante. Tambe e gobierno di MEP na 2009 a laga un suma di 970 miyon florin den caha di gobierno pa e gobierno di Mike Eman derocha na nan antoho.
Gobernacion di MEP, 2017-2021
Na 2017 MEP a drenta gobierno atrobe y aki nos a topa cu e desaster financiero hamas bisto den historia di nos pais. Un debe nacional cu deficitnan acumula y cu e gobierno di AVP a aumenta di 2.1 Biyon na 2009 te cu 4.2 Biyon na 2017. Fuera di esaki tur e debenan di e proyectonan PPP y cu na 2018 bao di e gobierno actual mester a cuminsa paga esaki pa un suma di 85 miyon florin pa aña y durante 30 aña largo.
Sinembargo Gabinete Wever Croes no a sinta yora, pero a lora manga di camisa/blusa y a cuminsa traha pa pone ordo den tur e desordo financiero aki. Y den apenas 2 aña di gobernacion ya na 2020 nos pais lo por a conta cu un surplus chikito den nos finansas publico. Pero na maart 2020 nos pais a ser azota pa un pandemia di Covid 19 nunca bisto cu a frustra tur e intento di Gabinete Wever Croes pa crea surplusnan structural y poco poco saca nos pais for di e desaster cu Mike Eman a hinca nos aden, anto cu debenan cu nos tur mester bay paga cu orguyo. Mester a busca ayudo di Hulanda pa enfrenta e situacion financiero grave ya cu e gobierno di AVP a laga e caha di gobierno plan bari. Y tabata hustamente e gobierno aki di MEP cu a percura pa introduccion di FASE, sosten salarial pa e trahadornan y ayudo den cuido pa enfrenta e pandemia mundial. Mester admiti cu e gobierno aki a haci un tremendo trabao hunto y den union cu henter e pueblo Arubano y cu awe nos tin e situacion di contagio di Covid bao control. Puntra bo mes kico tabata e aporte di e partidonan di oposicion pa yuda frena henter e crisis aki cu no ta sinta grita y instiga henter dia.
Awe nos tur por mira cu Aruba ta recuperando grandemente di nos economia, turistanan a cuminsa bishita Aruba atrobe y e fin di siman aki so mas cu 10 mil turista a bishita nos isla.
No tin motibo pa panico mas, Aruba ta progresando y ta den union y sin instigacion y creando miedo den nos pueblo door di oposicion nos lo sali victorioso un biaha mas.
Mientras cu MEP ta existi, Aruba ta salba.
