Ayera e caso contra di ex Minister Otmar Oduber a continua den e famoso caso Flamingo caminda Ministerio Publico a tuma caso cinco ora den su intento pa convence Hues, cu e lider di PPA ta culpabel di acusacionnan cu OM a logra acumula cu ta totalmente diferente cu e acusacionnan inicial cu a wordo presenta casi shete aña pasa.
Diabierna venidero abogadonan defensor di tur envolvi den e caso aki, lo haya oportunidad pa contradeci y purba di mustra Corte den Prome Instancia, cu Ministerio Publico den e caso Flamingo aki, ta manera sinta dilanti di un ”grabbelton” buscando cualkier cos chikito cu por zona of mustra robes, pa haya e acusadonan culpabel.
E acusacion contra di e ex Minister di Infrastructura ta bisa cu e lo a faborece un conoci of amigo di dje, pa loke ta otorgamento di un pida tereno y ni maske cuanto tanto Otmar como su abogado na varios ocasion a yega di mustra cu tur loke a tuma luga, ta pa e departamento cu a registra malo dor di bruha dos peticion pa tereno den otro, ta un muestra cu ta e ex mandatario lo a mal uza su posicion pa beneficia esunnan cu el a entrega e tereno.
Ora cu scucha e Fiscal-vocero di Ministerio Publico, e cabayero Patrick van der Biezen kende mesora a bin informa prensa di e posicion di su departamento, a lanta un serie di pregunta si realmente e argumentonan aki, den e mundo politico aki na Aruba, ta argumentonan realistico.
Si realmente ta argumenta cu ningun minister por haci algo pa un amigo, un famia of un conoci ora cu e ta Minister, anto ta tur minister den historia politico di e pais aki, ta corupto tambe y mester traha un KIA pa henter aruba, dicon y pa kico , pa Hulanda bin tuma over ? esaki ta e agenta di OM kisas?.
Aparato gubernamental, incluso algun miembro di ministerio publico, a ser nombra cu aprobacion di un minister cu na mes momento ta un politico tambe y cu e argumentonan di Ministerio Publico den e cas Flamingo, mester inicia henter un proceso den e aparato gubernamental pa mira acusa tur ambtenaar kendenan a ser nombra dor di un of otro Minister, di ta corupto y tur minister cu a haci a aproba cualkier nombramento, lo a haci esaki mal uzando nan posicion como mandatario.
E aparato gubernamental ta conoci di ta forma pa casi 85% di simpatisante-, famia- of sostenedonan di partido MEP y esaki ta data for di varios decada ya cu en realidad, ta mandatarionan via di directornan di departamentonan, a nombra e ambtenaarnan aki y pone nan den varios departamento di gobierno. Den caso di AVP ta mes un cos unda cu un solo minister tabatin mas di 100 coordinador rond di dje.
Ayera despues di a scucha argumentonan di Ministerio Publico pidi un castigo di tres aña di prizon, ta bolbe lanta e pregunta sin realmente Otmar Oduber lo tin un chens c’un sistema hudicial cu ultimo tempo ta wordo hopi critica.Nos ta tratando nos yiunan di tera husto ? si ? no? dicon no ?
Ex Minister Marisol Tromp den tempo cu e tabata forma parti di AVP, a nombra famia di dje sea como coordinado, sea den un posicion halto na entre otro Tele-Aruba, a duna su propio ruman den 1 siman di tempo permiso di tereno pero awor ta bira presenta acusacionnan contra Otmar Oduber, mientras cu den e historia di Marisol, tin hopi cosnan similar cu cual e kier pa Corte condena su ex compañero di partido. Unda ministerio publico a keda den e parti aki sit a trata tur hende husto manera ta ser bisa.
Entre otro tin un acusacion di OM pa motibo cu a bin haya un WSAP di ex Minister Oduber cu el a manda ta departamento di DIMP pa regla un eror cometi den e proceso di entregamento di tereno pero tin mensahenan tambe c’un Fiscal a yega di manda pa e propio ex Minister aki, pidiendo un fabor pa asfalta e tereno rond di e edificio nobo di OM.
Ora cu e mesun ex minister aki a logra pa haya DOW pa asfalta e tereno un Fiscal a dirigi un mensahe di gradicimento na e mandatario pa logra di asfalta e tereno pa e departamento aki.
Ta kende mag awor y kende no mag di pidi un mandatario un fabor of ki ora esaki no ta “strafbaar” y ki ora e no ta “strafbaar,” ya cu e Fiscal ey tambe a pidi un fabor di e ex Minister pa haya asfalt pa tereno di edificio di Ministerio Publico.