Dellanire Maduro, lider di Fraccion di POR den Parlamento a comenta riba e introduccion di e lista positivo di remedi cu lo mester a drenta na vigor dia 1 di februari 2021. E cambio aki a wordo poni “on hold” pa asina nos profesionalnan den sector di salud por duna nan aporte na e reforma cu mester tuma luga atraves di e comision nacional/multidisciplinario recien instala.
2 siman pasa parlamentario Maduro como presidente di comision fiho di parlamento di salubridad publico y cuido di nos grandinan a tene un reunion cu diferente representantenan di sector medico unda cu nan a expresa nan preocupacion pa cu e continuacion di e recorte den cuido di 5 miyon pa luna den aña 2021. Recorte cu por cierto no tin ningun estudio riba su posibel impacto cu ta haci e “voorwaarde” aki di Hulanda den un lapso di tempo cortico uno iresponsabel.
E estudio (doorlichting) cu PwC a realisa pa AZV fecha 20 november 2019 no ta menciona recorte di 5 miyon manera ta ser bendi. Den e documento ta menciona cu e aumento di gasto den cuido ta un TREND MUNDIAL cu ta wordo causa debi na envehecemento (vergrijzing) y innovacion den cuido. Basa riba e desaroyonan premira di e posicion financiero di AZV mester tuma accion, sino e “landsbijdrage” lo sigui aumenta y cu hunto cu stakeholders mester defini cua instrumentonan/cambionan lo introduci pa limita e aumento di gasto di cuido den futuro.
Maduro a menciona cu ora realisa cambionan di e indole aki mester ta pa mehora e calidad cuido y no pa nos calidad cuido bay atras teniendo na cuenta cu e resolucion di Asamblea General di Nacionnan Uni na aña 2019 relaciona cu “Universal Health Coverage” cu e idea cu tur persona tur camina na mundo mester tin acceso na cuido y di calidad, cu mester percura cu e uzo di servicio medico no ta pone e personan den un dificultad financiero. Esaki ta razon pa locual Maduro ta di opinion cu durante di crisis di COVID-19 no ta e momento pa realisa reforma di golpi ni varios cambio simultaneamente. Mester involucra tur stakeholder y introduci cambio den fase y ta spera cu Hulanda realisa esaki.
Pa tal motibo e ta sostene e decision di pone un paro na e introduccion di e lista positivo nobo, pa ehecuta e cambio den e lista di remedi positivo mester percura na prome instante cu tur dunado di cuido den e caso aki dokter di cas, specialista y botica tin un sistema digital di registracion cu ta compatibel cu otro y cu por comunica cu otro atraves di esaki di forma eficiente cu tambe lo contribui na reduccion di gasto. E ta duna mas transparencia si un specialista por ehempel a inicia un medicamento diferente of cambio di dosis na un pashent e dokter di cas por haya sa esaki den seccion di remedi di su sistema digital y no cu e dokter di cas tin cu haya un scan di un “terugreportage”/email di e cambio di remedi of tin cu yama oficina di specialista ,asina haci uzo di informacion mas eficiente y evita cu confusion tuma lugar.
Esaki ta mescos pa locual ta resultado di laboratorio cu especialista of dokter di cas ta haya, debi cu actualmente e medico cu pidi pa haci un test di laboratorio e so ta haya e resultado, otro medico tratante di e pashent no tin acceso na e resultado di e test aki realisa, cu ta haci cu hopi biaha ta bolbe manda e pashent pa haci test di laboratorio cu ta contribui na mas gasto innecesario, siendo cu por a comparti e resultado di e test cu e pashent a haci previamente asina maneho fondonan mas eficiente.
Ta importante pa e boticarionan cu ta riba field duna nan aporta pa locual ta e actualizacion/cambio di e lista positivo di remedi y na mes un momento pa locual ta e ehecucion di esaki. Na final di dia ta nan lo mester atende cu e cambio aki. Tambe mester percura cu tur pashent y esnan den cuido ta bon informa di kico precies e cambio ta encera pa evita confusion y incertidumbre. Na mes un momento mester tin claridad con lo atende cu esnan cu ta den un situacion financiero vulnerabel, si lo bin cu e “zorgtoelage” of lo duna nan un tipo di “ontheffing”.
Finalisando Maduro a menciona cu mester reduci gasto den cuido di forma responsabel, haci uzo di fondonan mas eficiente sin cu esaki ta a costo di calidad di cuido.
