KRALENDIJK, Bonaire
Boneiru ta bayendo den bon direkshon, pero tin masha hopi trabou pa hasi ainda pa realisá e Boneiru ideal. ’ Asina gezaghebber Edison Rijna a bisa públiko siman pasá djárason anochi na Den Haag durante un enkuentro informativo pa boneriano ku ta biba na Hulanda Oropeo.
Mas òf ménos 50 boneriano bibá na Hulanda a duna oido na e invitashon di e delegashon di Kolegio Ehekutivo. Siman pasá Kolegio Ehekutivo a hasi un bishita di trabou na Den Haag. Durante e enkuentro informativo a informá e bonerianonan tokante desaroyonan na Boneiru. Nan a tende entre otro ku hopi kos a pasa durante e aña tras di lomba, pero ku esakinan den mayoria kaso a tuma lugá tras di kortina. Pues nan no ta visibel pa habitante, por ehèmpel fortifikashon di aparato públiko. ‘Nos komo Kolegio Ehekutivo riba hopi tereno lo ke bai hopi mas rápido, pero si nos no pone nos organisashon interno na òrdu promé, aki sinku aña nos ta mes leu ku awor aki,’ segun diputado Nina den Heyer.
E velosidat poko poko ku ta atendé drechamentu di nos kamindanan ta suprayá nesesidat di esei. ‘Sèn no ta e problema. Pa kuminsá nos tin ku tene nos mes na reglanan di destaho públiko, i nos propio forsa di ehekushon no ta sufisiente. Banda di fortifiká nos forsa di ehekushon nos mester di sanger fresku den nos aparato, hende hóben, enérgiko i kreativo ku ta sòru pa ánimo nobo,’ segun gezaghebber Rijna.
Diputado Den Heyer a haña e pregunta dikon Entidat Públiko Boneiru no ta hasi mas pa kombatí pobresa. ‘Maneho di pobresa ta un tarea insular, pero kontrali na munisipio hulandes, nos no tin e instrumento ku mester pa esei. Por ehèmpel ònderstant no ta kai bou di nos.’ Pa e motibu ei Nina den Heyer siman pasá den su kombersashon ku sekretario di estado di Asuntunan Sosial i Empleo Tamara van Ark i miembronan di Tweede Kamer, a boga enfátikamente pa traspasá ehekushon di ònderstant di Reino pa Entidat Públiko Boneiru.
Den su palabranan final gezaghebber Rijna a hasi un yamada na e presentenan pa sigui desaroyo na Boneiru bon i vigilá kua ta e vakaturanan ku ta bini liber riba nos isla. ‘Nos mester di boso i e konosementu i eksperensia ku boso a haña na Hulanda Oropeo pa huntu nos konstruí un mihó Boneiru.’
Riba potrèt:
Gezaghebber Edison Rijna i diputado Nina den Heyer durante e enkuentro informativo pa boneriano bibá na Hulanda Oropeo.
