Un delegashon di Boneiru a bishitá e konferensia di Sea Trade Cruise Global ku a tuma lugá na Miami Beach, Florida di 25 di aprel pa 28 di aprel último. Meta di e biahe tabata pa papia ku e kompanianan krusero tokante diferente tema di importansia pa ku turismo di Boneiru.
E delegashon di Boneiru ku tabata presente na e konferensia, tabata konsistí di diputado Hennyson Thielman, ku ta enkargá ku Desaroyo Ekonómiko, Miles Mercera komo direktor di Tourism Corporation Bonaire, Elesiër Angel ku ta e ‘cruise coordinator’ di Tourism Corporation Bonaire, Helvig Thode di departamento di Asuntunan Ekonómiko di Entidat Públiko Boneiru i Gunther Flanegin ku ta havenmeester di Entidat Públiko Boneiru.
Durante e konferensia, e delegashon di Boneiru tabata tin reunionnan fruktífero ku e diferente kompanianan di krusero. A splika e vishon ku Boneiru tin pa futuro desaroyo turístiko, kaminda lo enfoká mas riba benefisio pa nos poblashon i un eksperiensia úniko pa e turista.
Un tema importante tabata e ‘head tax’ nobo ku lo drenta na vigor pa turista krusero entrante 1 di yanüari 2023. Ta premirá ku e ‘head tax’ nobo di $10 lo generá un entrada pa gobièrnu di alrededor 3 pa 4 mion dòler èkstra kada aña. Lo invertí e sèn aki den mehorashon di e kalidat di bida di e pueblo boneriano i sigur tambe den e infrastruktura di Boneiru, manera nos kayanan i espasio públiko.
Otro punto klave pa Boneiru ta, pa risibí un barku krusero so pa dia. A papia atrobe ku e kompanianan krusero tokante e maneho aki. Gobièrnu di Boneiru a tuma e desishon aki for di aña pasá i a informá e kompanianan krusero e temporada ei. Awor Boneiru ta bai implementá esaki: ta bai ahustá e skema pa asina Boneiru por yega mas lihé ku ta posibel na e ‘one call’ pa dia.
Pa finalisá e delegashon tabatin hopi bon kombersashon ku e kompania krusero Royal Caribbean kaminda a palabrá ku nan ku ta bai traha huntu riba sierto puntonan manera mehorashon di e konekshon entre komunidat boneriano i turismo. Por ehèmpel invershon pa mehorashon di áreanan públiko i edukashon di mucha.
