Meta: Introdusí un buelo direkto entre Bogota i Boneiru
Tourism Corporation Bonaire(TCB)den kolaborashon ku e enviado spesial pa Boneiru, Edison Rijna, Holland House, Embahada di Reino Hulandes, BONHATA i Bonaire International Airport (BIA) a organisá un mishon komersial di dos dia pa Bogota, Colombia dia 31 di yanüari i 1 di febrüari. Meta di e mishon komersial tabata pa introdusí un konekshon aéreo direkto entre Bogota, Colombia i Boneiru.
Durante e último dos aña Tourism Corporation Bonaire a prepará un ‘business case’ suramerikano (colombiano), kaminda a invertí den un investigashon di datonan di mobilidat, un investigashon di inventarisashon di kamber i un investigashon di merkado pa evaluá e merkado suramerikano pa Boneiru. E investigashon a base di sifranan históriko i e tamaño aktual di merkado ta indiká ku Boneiru ta kla pa un konekshon aéreo direkto ku Colombia. E investigashon ku nan a presentá siman pasá na Colombia, no ta enfoká solamente riba turismo, pero ta enserá otro áreanan tambe di importashon i eksportashon.
For di datonan resien ta resultá ku Colombia ta un merkado importante pa Boneiru i ku e ta pertenesé na e tòp 10 di merkadonan di prosedensia den aña 2023. No opstante e ousensia di buelonan direkto i merkado (dirigí), na aña 2023 Boneiru a risibí un promedio di mas òf ménos 100 bishitante suramerikano pa siman, ku ta biaha via Kòrsou i Aruba pa Boneiru. Bishitantenan pa Boneiru for di Suramérika ta bini for di entre otro Colombia, Brasil, Argentina i Peru. Bishitantenan suramerikano ta bini Boneiru pa diferente motibu, entre otro vakansi (25%), bishitá amigu i famia (14%) i aktividat di deporte akuátiko manera sambuyamentu (5%). Brasil tambe ta un merkado di enfoke pa Boneiru, sigur ora ta trata di sambuyamentu.
Ku Colombia ta un merkado di enfoke, ta surgi por ehèmpel for di su kresementu ekonómiko rápido, su ekonomia ku ta drechando i su poblashon grandi ku ta kresiendo. Ku un poblashon di 52 mion hende (e di tres mas grandi di Amérika Latino) i un klase medio ku ta birando mas grandi, Colombia tin un kantidat konsiderabel di potensial bishitante i aeropuerto di Bogota ta un di e ‘hub’-nan mas stratégiko pa konekshon aéreo na Suramérika. Banda di esaki Colombianonan mas i mas ta interesá den biahamentu, kaminda mas òf ménos 40% di e poblashon ta keda identifiká komo biaheronan aktivo.
E delegashon for di Boneiru ku a konsistí di Elesier Angel (TCB), Miles Mercera (TCB), Maarten van der Scheer (BIA), Veroesjka de Windt (BONHATA), Luite Berkenbosch (BONHATA) i Bianca Peters (konsehero di e enviado spesial), bou di guia di enviado spesial Edison Rijna, tabatin un enkuentro ku funashonarionan di Pro Colombia, ANATO, diferente partner di aviashon, Civil Aviation Colombia i representantenan di Holland House Bogota.
Durante e lunanan binidero TCB i su partnernan lo keda den kòmbersashon ku e partnernan menshoná i nan lo invertí nan medionan aktivamente pa konektá Boneiru ku e ‘hub’-nan mas grandi na Suramérika.
