Boneiru a bishitá Palm Beach International Boat Show, Seatrade Cruise Global i Routes Americas 2023.
Un delegashon boneriano, konsistiendo di e direktor di Tourism Corporation Bonaire (TCB), Miles Mercera, e direktor di Bonaire International Airport (BIA), Maarten van der Scheer i Howard Mann di Campbell-Hill Aviation Group tabata presente na Routes Americas 2023 ku a tuma lugá for di 21 te ku 23 di mart na Chicago, Illinois. E tim a hiba kòmbersashon ku nos aktual kompanianan di aviashon merikano, pero tambe ku otro potensial kompanianan di aviashon, pa deliberá mas aleu tokante e posibilidatnan pa kuminsá ku mas buelo direkto for di Merka, Suramérika i Canada.
Pa promé biaha TCB tabata presente tambe na Palm Beach International Boat Show, ku a tuma lugá na West Palm Beach, Florida. TCB a bishitá e espektákulo den kolaborashon ku PADI, kaminda e presentenan por a eksperensiá un ‘Virtual Reality’, un realidat virtual di e mundu bou di laman di Boneiru. Tambe e presentenan por a registrá pa gana premio tur dia. E presentashon a tuma lugá for di 22 te 26 di mart 2023.
Na Seatrade Cruise Global tambe un delegashon boneriano tabata presente. Esaki a tuma lugá for di 27 te 30 di mart 2023 na Fort Lauderdale, Florida. Meskos ku e añanan anterior Boneiru a kompartí un stènt ku nos islanan ruman Aruba i Kòrsou. Esaki a brinda nos isla e oportunidat pa papia tokante e strategia aktual i esun di futuro ku e kompanianan krusero.
‘Nos partnership meeting-nan ta forma un parti anual importante di nos trategia, pa motibu ku nos ta firmemente konbensí ku nos tin ku sinkronisá nos esfuersonan ku otro i ku nos mester kompartí e aktualisashonnan mas resien di nos isla ku nos stakeholdernan. Desaroyo di turismo sostenibel ta un esfuerso konhunto di nos tur i nos ta gradisí nos partnernan di aviashon, industria krusero i operadónan di tour pa nan dedikashon i kompromiso pa loke ta trata nos destinashon’, segun e direktor di TCB, Miles Mercera.
