Futbol di hende muhe na Aruba ultimamente a crece y e delegacion di Aruba ta activo. Ultimo nan a representa Aruba na Republica Dominicana den e prome ronda di Concacaf women’s world cup qualifying unda cu nan a hunga contra El Salvador cu Barbados y awo lo bay den e di dos rond cu lo tuma luga na Belize y nan lo hunga contra di Belize y Panama.
Actualmente e trainingnan ta intensivo unda cu tin un laso di tempo te cu fin di Maart pa train pa asina prepara den comienso di April mirando cu e prome weganan lo ta den e prome siman di April. E dos weganan lo tuma luga na Berlize.
Arubaanse Voetbal Bond (AVB) un biaha mas lo busca 4 atleta femenino di Hulanda pa reenforsa e team di Aruba pa bolbe duna sosten na e delegacion di Aruba. Esnan cu a bin biaha pasa ya caba tin un bista kico ta nan fuerte y nan a wordo evalua tambe y despues di un reunion lo dicidi cua di nan lo bin pa reenforsa un biaha mas pa e di dos rond di weganan di Concacaf women’s world cup qualifying. E biaha aki enbes di seis hungado di afo solamente 4 lo bin back Aruba pa reenforsa e ekipo di delegacion.
Actualmente e delegacion di Aruba ta train tur dia y esnan di Hulanda lo mester train cu nan team di Hulanda. No ta desconoci cu e team di Panama ta e team di mas duro cu e delegacion di Aruba lo bay enfrenta, pero ta pa e motibo aki mes e trainingnan ta tumando luga pa cada un di e deportistanan bay prepara pa por duna e miho di nan.
E head coach ta Glen Sambo , assistent coach Veron Alberts, di dos assistent ta Miviene Henriquez , Goal keeper Coach ta Eduardo Loofstok y Dayane Wiersma ta Manager Coordinator y hunto nan lo dicidi kende lo bira e dokter y e fisioterapista. Aruba por sigui e weganan via di websitenan di Concacaf of riba TeleAruba ITV y riba facebook di AVB mes lo keda anuncia riba e wega cu lo tuma luga.
