Direktiva di Movementu Futuro Kòrsou (MFK) a tuma nota di deklarashon di Sr. Sheldrey
Osepa den medionan di komunikashon relashoná ku un protokòl ku mester a wòrdu firma
entre MFK i Partido Nashonal di Pueblo (PNP), tambe relashoná ku un reunion di
preparashon relashoná ku kontinuashon di e reunion di komishon sentral di 19 di ougùstùs
último i por último ku MFK ta un partner inkonfiabel.
Direktiva di MFK kier a aklará e puntonan aki, debí ku sr. Osepa ta mal informando
komunidat.
Protokòl;
Durante di un reunion entre direktiva di MFK i direktiva di PNP, kaminda un di e tópikonan
tabata e komportashon di srs. Osepa i Mercelina. Miembro di direktiva di PNP, sr. Faroe
Metry a bin ku e proposishon pa partidonan firma e protokòl ku sr. Osepa ta referí na dje.
Es mas sr. Metry a presentá un protokòl, ku den un gobiernu anterior a ser firma.
Direktiva di MFK a pidi pa un kopia di e protokòl ku sr. Metry a presentá i a informá
direktiva di PNP ku nos lo bai analisá e protokòl i tambe lo tradusí esaki na papiamentu. E
proseso aki a tuma lugá i a interkambiá e protokòl ku direktiva di partido nashonal pa nan
remarke i opservashon, despues di e proseso aki direktiva di MFK i PNP a yega na akuerdo
riba e vershon final di e protokòl.
E loke ku sr. Osepa kier laga aparentá ku ta MFK tabata kier pa su persona a firma un
protokòl pa sera su boka den Parlamento, ta kompletamente robes, ta su propio partido a
presentá e protokòl pa wak si di e forma ei nan por yega na kontrolá e funshonamentu di
Osepa i Mercelina den Parlamento.
Reunion di preparashon;
Despues di e reunion di konseho di Minister di 14 ougùstùs último, minister nan di Gabinete
Pisas II a keda den sala di reunion pa a atendé algun asuntu, durante di e interkambio aki,
Promé Minister a informá ku Minister Javier Silvania a tene un reunion di preparashon ku
frakshon di MFK pa e reunion di dia 19 di ougùstùs den Parlamento, Promé Minister a
puntra Lider polítiko di PNP si e ta sinti e nesesidat pa su frakshon tambe haña e
presentashon aki.
Riba e proposishon di Promé Minister, Sra. Larmonie-Cecilia a pidi pa dun’e espasio pa e
konsulta ku su frakshon. Dia 15 di ougùstùs (su siguiente dia), sra. Larmonie- Cecilia ta
informá Minister van Heydoorn ku frakshon di PNP ta di akuerdo pa risibí e informashon
tékniko aki. Basa riba e aprobashon aki di sra. Larmonie- Cecilia, a plania e reunion entre
frakshon di PNP i Minister Silvania. Srs. Osepa i Mercelina a ninga di presentá na e reunion,
miéntras ku lider polítiko di PNP a duna lus bèrdè pa Minister Silvania duna frakshon di
PNP e presentashon.
Mirando deklarashon di sr. Osepa, akusando MFK di ta esun ku a bin ku e dos proposishon
aki, direktiva di MFK no por konkluí otro, ku ta dos “Loose Cannon” PNP tin den
Parlamento i ku direktiva di PNP no por kontrolá Osepa i Mercelina i/òf no ta
komunikando na nan e liña i desishonnan ku direktiva di PNP ta tuma.
Inkonfiabel;
Por último, si pa Osepa i Mercelina partido MFK ta inkonfiabel, nan no mester kana bisa
esaki den prensa, den nan man nan tin akshonnan ku nan por ehekutá pa nan no ta den un
matrimonio ku un partner ku nan no ta konfia.
MFK ta para habri pa kualkier posishon ku Osepa i Mercelina kier tuma.
Direktiva di MFK
Sithree van Heydoorn
