ORANJESTAD, Aruba
Gustosamente awe mi ke trata algun tópiko ku tur tin di haber ku COVID19.
COVID-19 ta parse hopi leu pasobra aktualmente no tin niun infekshon na Boneiru. Na mes momentu hopi habitante di Boneiru ta sinti inkietut pa motibu di e kantidat di hende ku COVID-19 na Aruba, pasobra tin chèns ku biaheronan ta bini Boneiru ku e vírùs. Nos mes ta responsabel pa prevení ku e vírùs ta plama. Nos ta hasi esaki pa medio di tene distansia for di otro. Esaki ta nifiká tene distansia ora di saludá otro tambe, pues no duna man, no brasa, no duna ‘high five’ òf èlebog. Tambe ta importante pa evitá multitut di hende, pasobra e vírùs por plama fásilmente kaminda tin grupo di hende. Banda di esei ainda tin diferente tipo di medida di higiena, manera regularmente laba bo mannan ku awa i habon, no mishi ku bo wowonan, bo nanishi i bo boka i nister i tosa den bo èlebog òf lensu di papel. Finalmente, bo tin keho? E ora ei keda kas i yama e number grátis 0800-0800. Si tur hende tene nan mes na e medidanan aki, nos ta hasié hopi difísil pa e vírùs por plama i nos ta protehá nos mes i e hendenan rondó di nos.
Aruba
Entrante 6 di ougùstùs 2020 Boneiru a suspendé e ‘air bubble’ ku Aruba pa motibu di oumento di e kantidat di hende ku COVID-19. Awor aki Aruba ta un pais di riesgo haltu, meskos ku St Maarten. Espasio aéreo ta keda habrí si, pero pasaheronan no ta liber mas pa biaha di Aruba i Sint Maarten pa Boneiru i vice versa. E desishon aki a bini despues ku e kantidat di kaso di personanan kontagiá ku COVID-19 a subi drástikamente na Aruba.
Ta konsehá biaheronan entre Aruba, Sint Maarten i Boneiru pa posponé nan biahe un ratu. Personanan ku pa un motibu spesial tòg mester bini for di Aruba o Sint Maarten pa Boneiru ta obligá pa yena e deklarashon di salú i bai den karentena durante 14 dia, manera ta menshoná den e ordenansa di emergensia.
Tur hende ku te ku 5 di ougùstùs tabata na Aruba i a bini bèk mester vigilá nan propio salú hopi bon. Si bo tabata den kontakto estrecho ku un persona ku a tèst positivamente, e ora ei mèldu bo mes na Salú Públiko via di e number gratis 0800 0800. Mésun kos ta e kaso si bo a bishitá e barnan i e ‘gym’ ku nan a klasifiká komo sitionan di riesgo. Si esei no ta e kaso, e ora ei – manera semper – mantené distansia bon, no bai enkuentronan grandi, keda kas si bo tin keho i yama 0800-0800 mesora. Muchanan ku a bini bèk for di Aruba siman pasá i no tabatin kontakto direkto ku un persona ku a tèst positivamente por bai skol nòrmalmente otro siman. Si ta otro, esta den kontakto ku un persona ku a tèst positivamente, keda kas i kontakt Salu Públiko via di e number gratis 0800 0800.
Regreso pa Boneiru
Residentenan di Boneiru ku ainda ta na Aruba, por regresá Boneiru ku un dispensashon di gezaghèber. Por hasi petishon pa e dispensashon aki na repat@bonairegov.com. For di momentu ku espasio aéreo a habri bèk na yüli, ya kaba a indiká ku biahamentu ta tuma lugá riba propio riesgo. Por lo tantu no ta bini sosten finansiero pa hendenan ku no por bini bèk. Residentenan di Aruba ku ta na Boneiru mes ta responsabel pa regla nan regreso pa Aruba.
Biahamentu pa Saba
Pa loke ta trata biahamentu pa Saba ta konta ku tur hende ku ta bai Saba mester bai den karentena, pa motibu di un oumento di infekshon dentro di e ‘air bubble’.
Kuido agudo i intensivo
Kuido agudo i intensivo ta na òrdu. Hòspital tin medionan èkstra i personal èkstra i ku esei a ampliá e kapasidat di Kuido Intensivo te na 7 kama di Kuido Intensivo. Si kuido mas kompleho òf otro kuido médiko ta nesesario, ta transportá e pashènt ku avion pa un hòspital den region. Tin dos ‘air ambulance’ 24/7 kla pará na nos aeropuerto pa esei. Kuido ku no ta pa COVID-19 ta sigui nòrmalmente. Por duna akohida i tratamentu na ámbos fluho di pashènt. Pasobra spesialistanan prosedente di Aruba aktualmente no por bini Boneiru, ta duna e kuido en kestion mas tantu posibel via konsulta digital riba distansia.
Maneho di tèst
Por tèst tur hende ku tin keho di salú ku lo por ta mustra den direkshon di COVID-19. E kehonan aki ta: fèrkout di nanishi, doló di garganta, tosamentu, kentura òf kayente di kurpa i pèrdida diripiente di holó òf sabor. Si bo tin keho yama e number grátis 0800-0800. E number aki ta alkansabel tur dia for di 8 or di mainta te 10 or di anochi. Un enfermera òf enfermero di departamentu di Salú Públiko ta yama bèk pa traha un sita pa tèst.
Kaya di tèst
Riba djamars 18 di sèptèmber di 4 or te 6 or djatardi hendenan ku tin keho leve di salú por laga tèst nan mes den e ‘COVID-Drive Through’. Yama 0800-0800 pa un sita. Hendenan ku tin kentura i ta bastante malu no mester warda riba e kaya di tèst, pero nan mester keda kas i yama 0800-0800. Lo tèst nan na kas.
Bèk na skol
Pa nos muchanan ta importante pa bai skol i hunga ku otro, siña i hasi deporte. Esaki ta di importansia pa nan salú i pa nan desaroyo. For di investigashon ta konosí ku mucha no ta transmití e vírùs hopi biaha. Pa e motibu aki nos muchanan di skol básiko i di SGB por bai skol nòrmalmente. E medidanan ku a tuma promé ku vakansi di skol ta na vigor ainda na komienso di e aña eskolar nobo. Ta trata por ehèmpel di medidanan di higiena, tene distansia i prohibishon pa mayornan ta den kurá di skol. Di gran importansia ta ku muchanan ku tin fèrkout i kentura òf ku tin tosamentu no ta bai skol pa un temporada kòrtiku, pero ku nan ta warda na kas te ora e kehonan pasa.
Eventonan
Nos ta mira ku noshon di riesgo serka hopi hende ta hopi abou. Esaki realmente mester kambia. Den otro paisnan infekshon den grupo ta oumentá despues di eventonan i otro aktividatnan kaminda hopi hende ta bini huntu. Pa e motibu aki di inmediato ta bolbe inkluí distansiamentu sosial den e ordenansa di emergensia. Nos lo ta hopi reservá ku dunamentu di pèrmit pa tenementu di evento i nos lo bolbe tira un bista riba e pèrmitnan ku nos a duna kaba. Nos lo wak krítikamente si e organisadó ta kapas pa organisá e evento na un manera seif i responsabel pa protekshon di salú públiko.
Empresanan
Awor aki hopi empresa na Boneiru ta asumí nan responsabilidat. Pensa riba registrashon di kliente den restorant i kanselashon di evento. Mi ta apresiá ku empresanan ta hasi esaki i mi ta spera ku otro empresanan ta sigui e ehèmpel aki. Nos mester di e bon inisiativanan aki riba nos isla pa prevení plamamentu di e vírùs i pa por hasi investigashon di fuente i kontakto adekuadamente.
Moshon di D66
Ayera ‘Tweede Kamer’ unánimamente a aprobá un moshon di D66 kaminda ta bini ku un obligashon di tèst pa tur hende ku ta biaha pa Boneiru. Esaki ta un bon desaroyo pa Boneiru pa protekshon di salú públiko kontra COVID-19. Nos ta sigui vigilá e desaroyonan i nos ta spera ku gobièrnu hulandes ta reakshoná positivamente riba e moshon aki.
Finalmente
Nos tur ta kla ku COVID-19, pero COVID-19 no ta kla ku nos ainda. E vírùs t’ei ainda. Aunke ta algu fèrfelu, tòg ta importante pa nos keda tene nos mes na e medidanan. Pues evitá sitionan ku hopi hende i mantené 1,5 meter di distansia for di otro. Paden tambe. Solamente asina nos ta protehá otro i nos ta para plamamentu di e vírùs. Ta importante pa tur hende realisá ku ta nos mes ta responsabel pa nos propio salú i salú di nos próhimo. Solamente huntu nos ta logra haña COVID-19 bou di kontròl.