Prome Minister di Aruba a duna un splicacion amplio di e refinanciamento di e debe di COVID. Riba 13 di maart aña 2020 na momento cu prome casonan di COVID a bati na porta di Aruba. Segun Prome Minister Evelyn Wever Croes e tempo ey ya caba IMF a pre mira cu Aruba tabata un di e pais nan cu e COVID lo a dal hopi duro door di e dependencia grandi den e area turistico.
E mercado financiero a cera ariba Aruba y no tabata dispuesto mas pa presta Aruba placa na e momentonan ey, pero e prioridad di gobierno di Aruba na e momento ey ta pa scapa bida di hende y despues e prioridad nr 3 ta e recuperacion di Pais Aruba.
COVID a bay cu 25 % di GDP esey ta debi cu dia 16 di maart mester a cera frontera di Pais Aruba y a habri bek 1 di juli 2020. Na momento cu Aruba a dicidi di habri frontera e resto di mundo no tabata asina leu y varios a declara Aruba pa cowboy na momento cu Aruba tabata cla pa habri e frontera. Segun prome Minister Evelyn Wever Croes e realidad ta cu Aruba por a habri frontera debi cu tabata cla pe y esey ta danki na tur e profesionalnan.
Sinembargo na momento cu e cera frontera esaki a costa Aruba un 244 miyon na entrada cu no a drenta pa Aruba mas y banda di esaki gobierno tabata tin extra gasto. Esaki a bin cu ne tambe cu pa prome biaha gobierno mester a carga gastonan cu normalmente e no ta carga. Sector publico mester a sigui wordo carga debi cu operacion mester a sigui. Tambe a bin extra gasto di salubridad debi cu mester a maneha un pandemia asina grandi, a bin extra gasto pa por a maneha un crisis unda cu control nan mester a tuma luga y e informacionnan cu mester a wordo comparti, pero na mes momento mester a takecare pa e sector priva.
Segun prome minister Evelyn Wever Croes a bini cu subsidionan di salario pa asina doñonan di trabao no mester a kita hende for di trabao, ta trata aki di un cantidad di 18778 persona y a costa Aruba 422 miyon florin pa subsidio pa e trahadonan por a sigui haya nan salario. Tambe a bin cu e proyecto di fase pa esunnan cu a perde nan trabao e tempo ey debi di e pandemia unda cu 1246 persona a haci uzo di e fase aki y cu a costa 79 miyon florin.
Segun prome minister Evelyn Wever Croes banda di esaki tambe gobierno a bin cu un proyecto di sosten pa e negoshinan mediano y chikito unda cu a ricibi un sosten di 4 mil florin pa kwaartal pa yuda nan pa cubri otro gastonan y cu e parti aki a yuda 2522 companianan media y chikito y na unda cu e parti aki a costa Aruba 44 miyon florin. Tambe tabatin paketenan di cuminda cu mester yuda famianan cu no por a yega na cuminsa. Un cantidad di 6201 persona a haci uzo di esaki y a costa 14.2 miyon florin. Tur esakinan ta pone cu e gastonan a bira hopi mas grandi cu normal y e entrada nan a bira hopi mas menos cu normal.
Segun prome Minister Evelyn Wever Croes den circunstancianan asina e unico manera pa sobrevivi na e momento ey ta pa bati na porta di Hulanda. No tabatin ningun otro alternativa, y na momento cu a bati na porta di Hulanda nan tabata dispuesto pa yuda, pero cu condicionnan. Desde un principio Hulanda a papia di diferente condicionnan pero esunnan cu a keda mas prominentemente presente tabata e Rijkswet di COHO y e Rijkswet di RAFT.
