E debate tan spera di KvK diahuebs anochi a finalisa cu hopi critica pa e forma organisa, pero tambe e comentarionan ta cu e unico nan cu a sobresali tabata e lider di Accion21, esun di MEP , POR y RED.
Miguel Mansur a sobresali pa su inteligencia y a hala atencion cu su exposicion pa elimina e belastingnan cu ta cobra e consumidornan y pone solamente un tipo di belasting. Prome Minister Wever Croes tambe a sobresali cu su ponencianan di con ta bay combati corupcion. Loke a resalta tambe tabata e lider di RED, cu a mustra un trankilidad grandi. Un actuacion completamente diferente di e anterior debate na 2017.
Lider di AVP, PPA, Raiz y Curpa no a haya sufiiente pregunta pa por defende nan mes of debati realmente, mientras cu MAS tabata manera riba un biahe di venganza. HTC di otro banda a demostra di ta biba den un mundo estilo di Alice in Wonderland.
Diahuebs anochi tabatin e prome debate organisa door di Camara di Comercio. Un debate cu a resulta cu completamente diferente di loke tabata custumbra den pasado y cual a ricibi hopi critica.
E debate tabata mustra hopi amateur hinca den otro. Preguntanan tabata bruh y ripiti, cu mal papiamento skirbi.
E formula uza e aña’ki cu participacion di diesdos partido politico sigur no tabata esun mas facil, pero e por tabata miho hinca den otro. Pa cuminsa e ambito tabata uno manera temeroso cu e participantenan manera den un scuridad. Tabatin un falta di luz enorme pa un evento asina serio.
Un pregunta ta wordo haci largo y ta tuma casi 30 seconde pa e moderador les’e y e politico tin solamente un minuut pa contesta. Imagina ta puntra con ta bay combati Corupcion of atende cu deficit pa hacie na norma aceptabel internacionalmente y tin solamente un minuut pa contesta.
No tur politico a haya e mesun pregunta tampoco pa e pueblo por evalua cada uno riba nan plan y ideanan. No ta duna un balans na e evento.
Banda di esaki, e Moderador no tabata esun miho. Ta haci fout den e preguntanan cu mester haci, ta lubida di duna chens na participante y ta papia mas hopi cu e tempo cu e mesun participantenan tin pa contesta e preguntanan. Den pasado Ruben Trappenberg (dfm) a haci un excelente trabou.
Tabatin un desbalance tambe ora cu pone tur e 12 partidonan hunto den un evento, entre otro pa cu e oportunidad di contesta. Lo ideal tabata pa graba e dos eventonan aki, entre un grupo di e partidonan cu tin asiento caba of tin hopi aña di existencia, y den un otro sesion tur e partidonan nobo. Despues ta habri un sesion di voto pa mira cual seis partidonan ta bay den un sesion final. Of tin diferente otro formula, pero esun uza diahuebs anochi sigur no tabata esun miho.
Pa pone e cherrie riba e bolo, a duna e televidentenan e chens pa haci votacion despues di cada pregunta. Riba Facebook por a mira hopi critica cu despues di e preguntanan general y e dos prome preguntanan di e debate, hopi hende no por a sigui vota mas. No ta conoci si e sistema a pega, of no tabata bon hinca den otro pa atende cu tur e hendenan cu kier a participa den e encuesta.
E comentarionan tambe na final di anochi cu e sesion aki no tabatin nada di debate den dje.
Esaki ta un bista cu tin di un cantidad mas grandi di comentarionan riba medionan social y tambe personanan cu a yama mesa di redaccion y critica.
