Pa celebracion di “Dia Internacional di Poesia” proclama pa Unesco, Biblioteca Nacional conhuntamente cu Departamento di Cultura a organisa un evento pa celebra e dia aki. Prome Minister Evelyn Wever – Croes cu a asisti e evento a expresa cu a mira y scucha hopi arte inspirativo y a enfatisa cu “Creatividad no ta un opcion, e ta hopi esencial”.
Aruba ta den luna di celebracion. Recientemente a celebra “Dia Internacional di Lenga Materno”, tambe tabatin diferente actividad y celebracion den cuadro di celebracion di “Dia di Himno y Bandera” y awor celebracion di “Dia Internacional di Poesia”.
Ya pa algun aña Biblioteca Nacional y Departamento di Cultura exitosamente ta organisa y celebra e ocasion ki. Y cada aña ta un desafio pa por iguala e exito di e aña anterior. A pesar cu pa dos aña no por a organisa e evento pa motibo di Covid, aworaki un y tur ta contento cu por a celebra esaki hunto bek.
“Ta importante pa reconoce cu cada un di nos a maneha e pandemia na diferente forma, y e arte di poesia sigur ta uno cu a inspira ami. Tambe mi a keda hopi contento di por a scucha varios participante cu poeta di patria. Pesey mi kier a gradici cada un artisa pa e inspiracion cu ta brinda comunidad den momentonan di lucha y retonan cu ta pasa aden”, Prome Minister a expresa.
Pa conclui, Prome Minister a expresa palabra di elogio pa e organisadornan, y particularmente na tur artista cu a participa y expresa diferente poesia, obra y cantica. Demostrando e amor cu tin pa nos mes, pa famia y pa Aruba.
