Prome Minister Evelyn Wever-Croes a bishita IPA (Instituto Pedagogico Arubano) pa haya sa mas di nan proyecto ganado a traves di EduTech. Como un di e ganadonan di ciclo 7 di EduTech, IPA a ricibi 2 E-Board interactivo y 15 tablet.
Durante e bishita di Prome Minister, studiantenan di klas 3 y 4 a duna un presentacion di nan bunita proyecto cu un demostracion di e borchinan interactivo Pro-wise y e Samsung E-board. E mandatario por a observa a traves di e presentacion, con e tecnologia aki ta trece facilidad den e futuro profesion di e studiantenan y asina lo duna e docente di mañan mas tempo pa duna atencion personalisa na e alumno cual ta di suma importancia.
Prome Minister ta indica cu el a keda impresiona y contento pa mira con e studiantenan ta brasa digitalizacion. Enseñansa por medio di material interactivo, klasnan cu tecnologia di mas moderno ta haci lesnan mas atractivo y interesante pa e studiante. Gobierno lo traha pa ancra esaki den ley, den curiculo y asina esaki lo no ta opcional pero ta bira standard den enseñansa na Aruba. Proyecto manera esun di IPA y tur e otro ganadonan di EduTech tin un impacto significativo y ta habri caminda pa enseñansa di calidad cu lo brinda un futuro briyante na e studiante.
“Mi ta felicita IPA cu e proyecto aki di cual mi ta sintimi hopi orguyoso y contento cu a traves di e proyecto di Edutech di nos Ministerio di Innovacion esaki a bira un realidad. Nos a caba di cera ciclo 8 unda durante 2 aña Gobierno a inverti mas di 800 mil florin. Ciclo 8 tin 25 scol ganado cu proyectonan bunita, interesante y innovativo. Mi ta gradici tur e scolnan cu a inscribi nan proyectonan y participa durante e 8 ciclonan. Danki na tur cabesante, maestro y studiante pa kere den innovacion ya cu di berdad esaki ta e caminda di e futuro di nos enseñansa”, Prome Minister a expresa.
