E deklarashonnan di minister di asuntunan interior bou di kua
Boneiru ta kai komo entidat públiko ta pone mi trese e siguiente deklarashon. Na Boneiru nos
ta konsiente i ya pa añanan nos ta hiba kampaña den nos komunidat pa spar mas ku ta
posibel riba uso di energia, esta riba uso di awa i koriente. Pues riba su mes e minister no
mester manda nos hendenan bai baña ménos ni uza ménos èrko. Ademas e minister ku e
deklarashonnan aki a demonstrá di no tin konosementu di nos situashon klimatológiko kaminda
temperatura di 33 grado pa dia ta algu normal den nos ambiente. Freska nos kurpa te dos biaha
pa dia ta parti integral di nos bida diario i sende èrko òf pone un fèn ta nesesario sigur na ora di
drumi pa nos hendenan tin un deskanso físiko i mental pa tur dia lanta di nobo ku energia i
ehersé nan labor. Ta e mesun Hulanda, e minister di enseñansa ku a rekonosé ku e temperatura
haltu ta un opstákulo pa nos muchanan por siña den un ambiente di lokalnan kalor i a opta pa
pone èrko den tur klas aki na Boneiru. Loke mi ta haña mas importante ta ku e minister mester
sa ku gabinete Rutte, di kua minister Ollongren ta forma parti di dje a komprometé su mes pa
rebahá e gastunan haltu di kosto di bida i di hasi negoshi na Boneiru. Sekretario di estado
Tamara van Ark dia 10 di òktober 2019 a skirbi ku un di su metanan ta pa rebahá
strukturalmente e gastunan di koriente riba nos islanan. Te awe esaki no a keda realisá. Loke
nos por konstatá ta ku e gastunan di bida desde 2019 juist a subi: entre otro preisnan di
kombustibel, produktonan den supermerkadonan i tarifanan di koriente a subi drástikamente.
Mi por a konstatá ku for di 2019 WEB den konsulta ku ministerio di EZK a traha un plan di
energia pa yega na 80% di produkshon di energia duradero ku un meks inovativo di mulina di
bientu, energia solar i reserva dor di bateria. E invershon aki lo kosta 58 mion dia kua e petishon
ta pa 32 mion na supsidio. Esaki lo tin komo konsekuensia ku e tarifanan lo baha
poulatinamente ku 50% kompará ku e tarifa aktual di 29 sèn di dòler pa Kilowatuur. Lo tin un
bahada di 15 mion dòler pa aña ku ta un bahada pro medio di 24 dòler pa luna pa un kas di
famia.
Supsidio di e 32 mion dòler lo duna realse na e deseo ekspresá dor di Tweede Kamer atraves di
e moshon di Atje Kuiken kaminda e ta supliká gobièrnu Rutte, di kua Ollongren tambe ta forma
parti pa: “het openbaar lichaam Bonaire c.q. WEB actief te faciliteren bij het spoedig
verkrijgen van voldoende middelen/subsidies om het verduurzamingsplan uit te voeren op
een wijze die bijdraagt aan een structurele verlaging van de tarieven”.
Mi por imaginá mi ku awor ku tin disponibel un montante èkstra di 6.8 miljard Euro un supsidio
pa un invershon di 32 mion ta pas kompletamente. E efekto di e invershon aki ta baha e
gastunan di kosto di bida i di hasi negoshi i ta kontribuí na e metanan klimatológiko. E ta kumpli
ademas ku palabrashonnan hasi anteriormente i e diferente moshonnan. E proyekto aki ta
garantisá un produkshon di energia duradero i konfiabel na Boneiru, e ta disminuí nos
dependensia di kombustibel tradishonal(petroli), e tin un efekto positivo riba nos turismo(80%
duradero i sostenibel) i ta baha e gastunan di kosto di bida i di hasi negoshi strukturalmente.
Komo frakshon Coffie mi kier informá bo ku e proyekto aki tin mi sosten kompleto i mi kier urgi
minister Ollongren pa hasi su máksimo esfuerso pa konvensé su kolega di EZK i gabinete pa no
tarda mas ku duna aprobashon na e petishon pa e supsidio di 32 mion dòler. Esei lo ta muchu
mas efektivo ku bai gasta sèn na material di promoshon pa baña ménos i usa ménos èrko. E lo
demonstrá ku e gabinete ta serio den su esfuersonan pa redusí gastunan aki riba nos isla den e
lucha pa limitá pobresa mas tantu ku ta posibel. Palabra i akshon awor ta na minister Ollongren.
Nos pueblo tambe tin derecho riba un desaroyo riba e tereno di energia aki ku ta duradero i
sostenibel. For di 2008 nos a skohe e rumbo aki i riba propio forsa a hasi invershonnan I na e
otro un banda ta deber di gabinete i di nos minister di asuntunan interior pa hasi su máksimo
esfuerso pa sostené e esfuersonan aki i pa logra esaki.
