Pa pone su mes na haltura di e situashon
Na desèmber último konsehal Daisy Coffie a hasi un bishita di trabou na BHM pa pone su mes na altura di loke ta pasando den BHM i kiko for di punto di bista di BHM ta pasando den kompanianan di gobièrnu. Daisy Coffie: ‘Mi ophetivo pa bishitá BHM tabata pa pone mi mes na altura di un manera proaktivo di tur loke ta pasando ku BHM, kiko ta e plannan i kiko esaki ta nifiká pa e kompanianan di gobièrnu ku ta kai bou di BHM. Na BHM nos a haña un splikashon ekstenso di tur loke ta pasando ku e kompanianan di gobièrnu mirá for di e punto di bista di BHM. Tambe un splikashon di tur loke tin den tapara i un demonstrashon di e plannan ku ta kla pa keda ehekutá. E idea tras di un holdingmaatschappij ta un struktura ku den sektor privá tambe ta hasi uso di dje. Esta ora tin un kantidat di kompania pertenesiendo na mesun grupo, den e kaso aki na gobièrnu, ta pone akshonnan di e kompanianan bou di un kompania madre. Un holdingmaatschappij por sali na vanguardia di e kompanianan akí di un manera mas efikas i mas efisiente.’
Servisio sentralisá
Ampliando su splikashon konsehal Daisy Coffie ta trese lo siguiente dilanti: ‘Un holdingmaatschappij por tin diferente ophetivo, entre nan esun di akshonista i esun di un sentro di servisio. Den pasado kisas e idea di BMG pa manehá e kompanianan tabata un tiki di mas pero e mesun servisionan bou di BHM por ta mas faktibel. Komo holdingmaatschappij BHM por funshoná komo sentro di servisio dunando servisio sentralisá na su kompanianan yu. Ta trata di servisio manera entre otro “Financial Accounting”, “Financial Management”, “Human Resources Management” i “ICT Systems Management”. E kompanianan di gobièrnu ta muchu chikitu pa buska profeshonal pa atendé e tópikonan ariba menshoná sigur no full time pa kada kompania riba su mes. Pero huntu pa medio di BHM e kompanianan di gobièrnu por haña akseso na profeshonal riba tur e terenonan akí ku por duna servisio na e kompanianan. BHM por tuma e profeshonalnan full time den servisio i pone nan disponibel part-time pa e kompanianan. Asina e kompanianan por sigurá un nivel haltu di funshonamentu profeshonal riba e terenonan menshoná. Aparte di esaki BHM por tin un ròl spesial den restrukturashon di e kompanianan akí.’
Ratifikashon di parti di Konseho Insular
Tin un desishon pa likidá BMH riba mesa. Loke a sali na kla ta ku pa por likidá BHM e kuentanan anual di BHM mester ta al dia. Pa kuentanan anual di BHM ta al dia kuentanan anual di e kompanianan ku ta kai bou di BHM mester ta al dia, pasobra balor di esakinan mester reflehá riba e kuentanan anual di BHM. Tin un traspaso di akshon mester tuma lugá. E akshonnan aki mester representá un balor i e balor aki mester ta fihá pa medio di kuentanan anual. E proseso di likidashon di BHM no ta asina simpel. ‘No ta asina ku e desishon akí mester bin Konseho Insular komo ta trata propiedat di pueblo pa keda ratifiká?’, asina konsehal Daisy Coffie ta puntra su mes.
Konklushon
Pa un likidashon asina akí tambe mester di un plan di ehekushon, pasobra esaki ta un proseso legal basta ekstenso. Ta un pregunta atrobe ku e plan aki no mester keda ratifiká pa Konseho Insular. Daisy Coffie: ‘Segun mi humilde opinion likidashon di BHM no ta un proseso asina simpel manera polítikonan ke laga aparentá. Konkluyendo mi ta kere ku e diskushon mester ta pa fortifiká BHM di tal manera ku esaki na su turno por fortifiká e kompanianan ku ta kai bou di dje. Esaki lo kita tambe e sentimentu serka e kompanianan yu ku nan ta paga BHM sin ta risibí muchu servisio bèk pa esaki.
Pa logra esaki, mester pone polítika, i sigur polítika partidista na un distansia leu for di BHM. Esaki por logra dor di enberdat nombra e miembronan di hunta di komisario a base di nan profeshonalidat i traha a base di good corporate governance, distinguiendo den un forma skèrpi e responsabilidatnan ku kada entidat tin den e Holding. Reunion di Akshonista ta esun ku ta stipulá maneho di e kompania, hunta di komisario ta esun ku ta kontrolá i supervisá ehekushon korekto di e maneho basá riba prinsipionan di bon gobernashon di kompania i e gerensia tin e maneho diario di e kompania.’
