Komo parlamentario di Pais Kòrsou ketu bai den e mishon parlamentario pa Pueblo di Kòrsou, sigur sigur ta super importante pa mi sigui hasi preguntanan konkreto i al kaso na Minister di Finansa. Mi punto di bista kla i raspa ta ku un kobransa efektivo di afvalstoffenbelasting ta e solushon struktural pa finansiá i garantisá pa Pueblo di Kòrsou: un rekohementu struktural i semanal di sushi di kas dor di Selikor N.V.
P’esei pa medio di e karta di kontròl parlamentario aki, kual ta parti di mi Programa di kontròl parlamentario, mi ta hasi e siguiente preguntanan simpel, konkreto i al kaso na señor Minister Kenneth Gijsbertha a base di Artíkulo 57 di Areglo di Estado di Kòrsou i artíkulo 96 di Reglamento di Órden di Parlamento di Kòrsou:
- Den e reunion di Parlamento di Kòrsou tokante Presupuesto 2021 di Pais Kòrsou, Minister di Finansa a indiká ku tin 65 mion florin di afvalstoffenbelasting ainda riba kaya pa kobra kontribuyentenan ku no a paga e afvalstoffenbelasting. Pregunta:ki dia den aña 2020 por fin Ontvanger di Kòrsou lo kuminsá kobra esaki?
Pa asina: (a) garantisá un solushon struktural, pa por finansiá i garantisá pa Pueblo di Kòrsou: un rekohementu struktural di sushi di kas dor di Selikor N.V; i (b) por kuminsá paga e debe di 45.1 mion florin ku Pais Kòrsou debe Selikor N.V.
- Durante reunion di Parlamento di Kòrsou tokante Presupuesto 2021 di Pais Kòrsou, a bin dilanti ku Selikor N.V., mester kumpra den e aña 2021, 7 trùk sushi pa un balor di mas o ménos 3.5 mion florin. Segun e Rapòrt di Maneho Finansiero Pais Kòrsou Sèptèmber 2020, ta indiká ku Pais Kòrsou debe Selikor N.V. un total di 45.1 mion florin. Pregunta:mirando e debe ku Pais Kòrsou tin na Selikor, Pais Kòrsou lo por fasilitá Selikor N.V. e 3.5 mion florin pa kompra di e 7 trùk nan di sushi na balor di mas o ménos 3.5 mion? Si òf No?;
Pa asina garantisá un solushon struktural, pa por finansiá i garantisá pa Pueblo di Kòrsou: un rekohementu struktural di sushi di kas dor di Selikor N.V;
- A kuminsá formalisá un skema di areglo di pago (“aflossingschema”) pa e debe di Pais Kòrsou di 45.1 mion florin na Selikor N.V?. Si òf No. Dikon si òf No?
