Recientemente un total di 53 Centro di Cuido di Mucha a participa na e curso di profundisacion di Codigo di Proteccion den Centro di Cuido di Mucha. Un total di 83 trahador pedagogico a participa na e curso aki y a ricibi un certificado di participacion.
E meta di e curso tabata pa tur cabesante y 1 trahador pedagogico den e Centro di Cuido di Mucha por tin mas conocemento (practico) di e Codigo di Proteccion y pa conhuntamente por traha mas atento ariba e señalnan di posibel/sospecho di abuso di mucha. Pa e curso aki por tabata un realidad, un total di 3 fundacion a participa, pa asina den e 3 dianan di curso e Centronan di Cuido di Mucha por a haya tur informacion necesario pa nan por ta bon ekipa pa traha segun e Codigo di Proteccion. Ta trata aki di Fundacion Pa Nos Muchanan, Famia Plania Aruba y Fundacion Respetami, di cual nos kier a gradici nan di curason pa nan aporte profesional na e curso aki. Tambe tabata tin presentacion di mr. Patrick van der Biezen di Ministerio Publico, cu a duna informacion tocante con nan proceso ta cana, ora ta trata cu e casonan di abuso en general y e importancia di un testigo y ta documenta den tur esaki.
Pues e Centronan di Cuido di Mucha a hiba 3 dia intensivo di informacion, pero tambe activo na e variedadnan di presentacion. E intencion ta pa tur Centro di Cuido di Mucha por sera conoci cu e Codigo di Proteccion, pa asina tur por traha segun e mesun structura, ora tin sospecho di abuso (den tur sentido) ta tumando lugar cu e mucha. Cada Centro di Cuido di Mucha a ricibi na final di e curso un manual cu tur informacion di e curso di tur fundacion y alabes un poster, pa nan por pone esaki den nan Centro di Cuido di Mucha. Automaticamente a sugeri e Centronan di Cuido di Mucha pa nan pone den nan reglanan di cas, cu nan ta traha cu Codigo di Proteccion y asina tur mayor ta informa.
Tambe ta di remarca cu Departamento di Mucha y Hoben (DMH) conhuntamente cu FPNM, DVG, DAS y CBS ta den e ultimo fase, pa finalisa e prome Nulmeting nacional, unda 96 Centro di Cuido di Mucha a participa na esaki aña pasa, cu sigur ta un prome paso historico y relevante, pa cu cuminsa traha riba un vision nacional pa calidad di cuido den e Centronan di Cuido di Mucha na Aruba.
