Fundacion SIKI tin un curso na caminda cu ta hopi importante pa esunnan cu ta interesa pa drenta politica pero tambe pa esunnan cu ta traha den e aparato gubernamental. E curso yama “Con pa Goberna un Pais “ PhD Jayburtt Dijkhoff Presidente di fundacion SIKI ta duna di conoce cu fundacion SIKI ta un fundacion cu ta kere den epodera individuonan y stimula cambio social positivo, esaki ta pone cu e fundacion mester trece un tema cu ta toca nos tur cu ta biba aki na Aruba cu ta bon gobernacion.
Por papia riba diferente aspecto porehempel derecho di pashent, calidad di cuido, pero nos tur ta forma parti di un pais cu tin un sistema di gobernacion. Na momento cu mester bay bek y wak 40 añanan cu a pasa por a tuma nota cu organonan halto di nos Pais manera Algemene Rekenkamer , Raad van Advies y hasta corte di husticia a saca diferente rapport y of hasta veredictonan contra cierto minister nan pa actonan di corupcion. Segun Jayburtt Dijkhoff e sistema politico cu nos tin, democratico, estado di derecho ta fayando barbaramente. Esaki ta significa cu e ta fayando ami, abo y nos tur cu ta biba riba e pida baranca aki.
Sinembargo e no ta un curso cu ta bay ataca ningun persona, partido politico y tampoco ningun ideologia, pero e ta un curso pa por mira e sistema cu nos ta den dje.
Porehempel si nos mira e sistema como un mashin y e mashin tin diferente componente cu ta supose di traha bon pa e mashin por traha y sigui progresa y bay dilanti. Pero kico ta pasando e mashin ta stagna y con nos sa cu e ta stagna ta paso e rapportnan ta bisa cu nos finansas publico no ta bayendo bon, nos sistema legal no ta bay bon unda cu hopi parti di derechonan no ta wordo refleha manera mester ta. Tambe por bista cu hasta awor aki Aruba ta bou di un tipo di curatela cu yama landspakket pa motibo cu e sistema no a haci cu nos pais por wanta temponan di crisis debidamente unda cu cada bes mester bay bati na porta di Hulanda pa yuda nos. Sinembargo Hulanda por yega un dia y bisa cu no a bira tempo pa Aruba para riba su mes un pia, pero con pa haci esey ?
Segun Jayburtt Dijkhoff den e curso lo bay elabora con e sistema ta funcionando / fayando pero mas importante kico nos por haci pa mehora e parti aki pa awo pero tambe pa e siguiente generacion.
Lamentablemente tin politiconan ta pensa cu debi cu nan tin sea ta 10-20 of 30 aña den politica, kico un curso asina aki por brinda nan. Sinembargo segun Jayburtt Dijkhoff hustamente pa esunnan cu tin tanto aña den politica e curso aki ta hopi interesante debi cu e ta basa riba un investigacion cu a keda haci door di Jayburtt Dijkhoff mes.
Si mester duna un ehempel Hulanda ta inverti miyones di placa den universidadnan y comisionnan pa investiga pa haya perspectiva nobo , miho bisa pa haya comprondemento nobo di kico ta pasando y con nos por hacie miho. Esaki ta un parti cu ta refrescante pa esunnan cu ta den e area caba pa haya un perspectiva nobo y berdad cu nos por hacie diferente y miho. E curso “Con pa Goberna un Pais “ ta importante pa esunnan cu tin ambicion pa bira un politico y esunnan cu ta bay den politica activo pa eleccion otro aña 2025 ta mas importante pa nan forma parti di e curso, debi cu hustamente nan como politico nan nobo ta bay forma parti activo den e gobernacion di nos Pais. Importante ta pa tur hende sa con e sistema ta traha, unda e ta fayando, con nos por traha pa mehora pa tur nos ciudadanonan aki na Aruba.
