Stella Monsanto ta service director di quota internacional of Aruba pa aña 2023 -2024. Actualmente nos ta den luna di September y e luna aki ta e luna cu Quota ta duna pa conscientisacion di cuido di oido. Quota a cuminsa na cuminsamento di september a haci un conferencia di prensa pa invita pueblo di Aruba pa nan yama na e localidadnan cu Quota ta coopera cu nan e aña aki pa por haci e chekeo di oido.
Segun Stella Monsantos e cuater luganan cu ta coopera cu Quota e aña aki ta Dokter Cabena, FEPO, the specialist y SVB San Nicolas. Comunidad di Aruba a yama den e siman cu a pasa pa haci nan cita y awe a habri oficialmente unda cu e testnan lo cuminsa. Segun sra Stella Monsanto e testnan lo cuminsa 18 di september te cu dia 22 di september pa esunnan cu a haci nan cita pa nan por haci nan test na e diferente localidadnan.
Por bisa cu e audiencia ta grandi unda cu varios persona ta hopi interesa pa haci chekeo di nan oido. Esaki sigur pa Quota ta importante mirando cu ta haci esaki pa mas cu 32 aña caba. Ta haci e testnan aki tur aña pa asina conscientisa e pueblo di Aruba riba e importancia di nan oido.
Sinembargo tampoco no ta trata cu na momento cu Quota ta haci e campaña aki lo mester bay haci e chekeo di oido, pero durante di aña ta importante pa haci esaki regularmente. Cada un di nos mester cuida nos oido y ta importante pa tuma tempo pa haci e testnan necesario. Na momento cu haci e chekeo aki e ora ta mira si e oido ta bon of tin mester di un aparato pa por scucha.
Si un persona no haci chekeo y no ta controla si tin un situacion cu e mester atende y e no sa,e oido lo bay atras, mas tarda pa detecta cu tin algo mas, e oido ta bay atras. E consecuencianan ta bin despues unda cu no lo por tende bon mas y e ora no lo por scucha otro hende na momento cu ta papia cu bo . Na momento cu esaki sosode e persona por cay den isolacion y hasta den depresion na momento cu e no ta scucha mas.
Segun Stella Monsanto ta hopi importante pa tur hende ta consciente di nan oido. Quota su mensahe semper ta “ si e ta demasiado duro, demasiado cerca y demasiado largo e ta dañino pa bo oido “ Pesey mes abo como doño di bo curpa mester por cuida bo oido pa e ta saludabel.
Tur aña ta haci testnan y tur aña ta haci un evaluacion tambe. Segun Stella Monsanto di quota internacional of Aruba, haciendo e evaluacionnan aki por mira tin momento cu tin e balansa cu tin menos y despues diripiente tin mas, e resultado ta varia. Pesey mes e conscientisacion ta necesario pa asina e cifranan no subi y bira descontrola.
E conscientisacion ta hopi importante debi cu durante di carnaval y fiestanan ta caminda cu mas di zonido ta hopi duro. Pero no ta solamente pa esunnan cu ta bay fiesta, e control ta bon pa e personanan cu ta traha den companianan, esunnan cu ta traha den mundo di construccion cu tin materialnan cu ta zona duro ta personanan cu mester ta mas consciente di e daño cu e zonido ta haci na nan oido. Lamentablemente hopi di nan no ta consciente di esaki. Ta importante pa e companianan tambe ta consciente pa cuida nan trahadonan cu e parti aki.
Tambe den e area di pelukero na momento cu un persona ta blow cabey ta importante pa uza earplugs paso e zonido ta hopi duro, esaki ta e partinan cu ta mustra chikito , pero nan ta haci un efecto riba e bo oido.
Un di e gruponan cu ta di mas preocupacion ta e hubentud, berdad por uza headphone pero e zonido den e headphone con duro e ta, Hopi biaha nos hobennan ta uza headphone y e zonido ta hopi duro, hopi cerca y largo nan ta keda cu e headphone den nan horea y esaki sigur no ta sano pa e oido. Den henter e parti aki e hoben mester ta consciente cu e mester modera e zonido y tene na cuenta cu e mester cuida su oido.
Quota ta encurasha e hobennan pa bira mas consciente y pa nan encurasha nan mes y pa nan bin haci nan test nan debi cu hopi di nan no ta consciente di e perdida di oido y kico ta e consecuencia di esaki.
Despues cu e dianan di test termina Quota lo haci un evaluacion un biaha mas unda cu lo tin un bista cuanto hende a bin haci test e aña aki y tambe cuanto hende tin cu a perde nan oido poco poco cu nan no sa.
