Diadomingo ultimo, a hunga e ultimo buelta pa loke ta e campeonato di futbol femenino Copa Aruba Bank Liga Plata na terenonan di Estrella y Britannia. Mester bisa cu Arsenal como e unico ekipo a keda invicto durante henter e campeonato aki sin perde un wega. Mas cu claro ambos ekipo a clasifica pa e ronda final. Hunto cu Bubali y Arsenal nos ta haya e ekiponan di Britannia y Dakota cu tambe a logra nan paso pa e rond final.
Den e prome wega na tereno di Estrella, e ekipo di RCA y Dakota e enfrenta otro. Mester bisa cu Dakota tabata dominante y ta gana RCA cu e score di 8 – 1. E golnan pa Dakota a keda anota pa Sharriene Vrolijk cu 4 gol entotal sigui pa Lindsay Loopstok cu 2 gol, Richadela Williams cu 1 gol y Kynah Kock cu 1 gol. Pa RCA a anota Shady Aleins.
Den e di dos wega na tereno di Estrella, e ekipo invicto esta Arsenal ta gana Estrella 2 cu e score di 2 – 0. E golnan di Arsenal a keda anota pa Andrienne Morilloy Andreina Tromp.
Na tereno di Britannia na Piedra Plat e ekipo di cas ta enfrenta Riverplate. Aki e Lady Puma di Britannia ta gana River cu e score final di 4 – 0. E golnan di Britannia a keda anota pa Marylenne Alvarez cu 2 gol, Catherine Guzman y Zi-anna Loeptok ambos cu 1 gol.
Den e di dos wega La Fama ta enfrenta Estrella 1. Aki e ekipo di La Fama ta gana Estrella 1 cu e score final di 2 – 0.
E diadomingo aki lo tin e weganan di kruis finale pa 4or y 5or di atardi.Den e prome wega pa 4or di atardi, Arsenal lo enfrenta Dakota mientras pa 5or di atardi, Bubali lo enfrenta Britannia. Tene bon cuenta cu ambos wega lo ser hunga den Stadion di Frans Figaroa na Noord.
Un pabien na tur e ekiponan cu e participa na e campeonato Copa Aruba Bank Liga Plata. Hopi exito na Arsenal, Bubali, Dakota y Britannia den e playoff diadomingo awor.