Durante conferencia di prensa, Otmar Oduber di Plataforma Pais a elabora riba metemento politico den Ministerio Publico y corupcion den e organo aki. El a enfoca specificamente riba caso Flamingo, cual den algun siman di tempo lo cumpli 5 aña cu e investigacion a cuminsa contra su persona.
Algun siman atras, Otmar a indica cu politica ta meti diki diki den Ministerio Publico y awe e ta mas convenci cu nunca cu Ministerio Publico ta wordo maneha politicamente. E ta bisa tambe cu Ministerio Publico ta presta su mes na corupcion. “Un officier van justitie trahando pa Ministerio Publico ta permiti pa procesverbalnan falso wordo traha, a traha 7 rapport di BCI falso”. E officier aki tabatin tur acceso di mundo na 2019 na tur documento na DIP. E tempo ey durante investigacion di caso Avestruz, Otmar Oduber, cu tabata minister, a duna opdracht na director di DIP pa duna acceso na tur documento, incluyendo e documentonan procesa durante maneho di Oduber mes. Pero e meta no tabata esey, e meta tabata pa yega na Otmar Oduber na un of otro forma. A haci uso di e rapportnan falso aki pa drenta cas di Oduber na juni 2020. “Awe e caso ta den corte y e 7 rapportnan aki a wordo tira den prullenbak door di Ministerio Publico pasobra nan no tin cara pa enfrenta e acusacionnan cu tabatin den e rapportnan aki”. Otmar a declara.
Mas aleu e ta bisa cu Landsrecherche ta haci uso di strategianan abusivo y falso. “Ora ta malinforma, ora ta malusa testigonan, usa strategianan pa nan bisa cosnan cu bo kier scucha pa acusa otro hende, bo ta lubida cu ora e 31 testigonan declara (22 a declara caba), lo realisa cuanto porkeria, mentira y trocemento di berdad door di Landsrecherche a tuma lugar”.
Tambe Oduber a expresa cu Ministerio Publico ta permiti manipulacion di pruebanan, tambe cu nan ta conspira pa perhudica ciudadanonan cu e meta pa scapa nan cara, sin laga afo e aspecto discriminatorio di e entidad aki unda ta permiti Hulandesnan Europeo bin Aruba y ta malusa localnan den Landsrecherche. Di e 3 personanan di Landsrecherche cu a pidi pa wordo scucha, dos di nan ta Arubiano y un Hulandes, Landrecherche a bisa cu e dos Arubianonan, un di nan, e persona cu a traha e 7 rapportnan falso, a fayece y naturalmente no por wordo scucha, e otro no ta importa pa laga su identidad wordo conoci, pero esun Hulandes Europeo a pidi pa no laga su identidad wordo conoci. E persona aki ta esun cu a bisa cu e 7 rapportnan falso ta confiabel y di e forma aki a malogra bida di Otmar Oduber ya caba pa 5 aña.
Logicamente Otmar ta puntra su mes cual ta e motibo cu kier proteha identidad di e persona aki y peor ainda, ta manda un otro carta bisando cu nan ta lamenta cu nan peticion di proteccion pa e Hulandes Europeo a wordo publica y trata den prensa. “Esaki ta un par di e porkerianan cu ta tuma lugar den Ministerio Publico”.
Pero esaki no ta tur, Otmar a mustra prensa un carta di Procurador General dirigi na cabes di Gobierno di Aruba den cual e ta informa riba con e casonan ta andando. Ta parse cu gobierno ta pidi pa dune material pa persegui directornan y ministernan. “Si esaki no ta metemento politico, awe Ministerio Publico bin buscami awe tardi”.
Oduber a presenta otro carta caminda PG (anterior) lo a pidi pa no schors un persona debi cu e ta cooperando hopi bon den e caso Flamingo y su cooperacion ta necesario ainda. Es decir, hende no a wordo geschors pasobra Ministerio Publico a bisa DRH, gobierno y ministernan pa no haci esaki ya cu e ta bashando abou riba Otmar y cu despues lo regel e situacion di e persona aki riba cual tabatin investigacion.
Finalisando Otmar Oduber a enfatisa cu e no ta wordo acusa di a coy ni un Florin, el a wordo investiga, su fundacionnan a wordo investiga y den tur e añanan aki ni un solo acusacion contra dje di a horta ni sikiera un Florin. E intencion ta pa caba cune, pero “bo ta cay na rudia prome cu ami mester cay drumi riba e vloer aki. Pesey mi ta hiba e lucha aki y mi ta den e tunnel ta wak un lus na final y mi ta spera cu finalmente e aña aki cu poder di Dios, di mi tata cu a fayece 2 luna pasa y mi ruman homber, cu e porkeria aki ta caba e aña aki”.
