Su amiganan sa, cu Lady Ruth ta gusta musica di anjanan sesenta y setenta masha hopi mes. Su
curason ta semper inspira cu musica di e epocanan ey. Cancionnan bunita cu bunita letra y bunita
melodia of cu un bunita mensahe. Lady Ruth ta gusta musica na e idioma ingles, musica bailabel
cu cua e por baila y move libremente su curpa ariba e notanan musical alegre contagioso. Ta fe’i
tempo cu ela traha como DJ Operator-Locutora na Radio Kelkboom na 1973 ela conose mas y
mas musica pa hubentud, scuchando e programa pa hubentud presenta pa Ruben “Scorpio”
Garcia,( awe dfm.) . Na Radio Kelkboom, (despues cu e nomber “The fantastic master of sound”
riba banda FM) , Ruthy a conose tur clase di musica. Musica na idiomanan hulandes, ingles,
spanjo y papiamento. Tambe musica na portugues, frances y italiano. Musica clasico, musica
rock, musica beat, popular, romantico, crioyo etc. etc. Lady Ruth no ta gusta musica rap y of
robodob. E ta fada liher di e mesun ripiticion shen biaha. Nan ta monotono y no tin hopi
contenido impactante manera e musica di The Beatles, Bee Gees of Elvis Presley. Lady Ruth no
ta corda tur tur e bandanan musical, pero si hopi di e cancionnan bunita cu no tin dos mescos. Ta
pes’ey Lady Ruth ta gusta bay e fiesta “Happy Hournan” na Aruba Nautical Club, ora nan tin
esaki un ves pa luna asina of un ves cada dos luna asina cu e bandanan “Back on Track” di Ito
Stamper of “We and We Band” di Wiwi Pinja. Nos a goza un mundo atrobe recientemente na
Nautical Club, e biaha aki cu “We and We Band” y nos a baila non stop di 8 pm te cu 12 or mei
anochi. Nos a baila den grupo di amiganan hunto cu Judith, Thelma, Omaira, Sandra, Lydia,
Melva, Angelica y Doris. Nos a brinda riba Omaira su “Blessed Birthday” cu su dushi treat di
croquette y funchi cayente cu keeshi gesmelt ariba dje, y tambe “cheezeballs” super dushi ! Hopi
alegria na nos mesa asina mes sodando di e calor, pero cu un binja of cerves bon friuw. Nos
grupo dorna cu un cabayero den persona di escritor y Poeta Dominico. Nos a goza wak e
pareha, fiel bailadornan incansabel, Helene y Betto Ruiz move den nan baile bunita ariba pista.
Mas caranan contento ariba pista tawata Ike y Milagros Posner, Celine y su querido esposo, nos
amiga Glenda, Avis y hopi mas cu tambe ta gusta musica Oldies Back in Time. Wiwi Pinja di e
banda “We and We” a toca su guitara electrico y su sinfonia di boca manera ta ayera, cu e mesun
pasion y zjeito, numa su edad tambe ya te 60 plus pero su curason ketobay cu un spirito hoben.
Wiwi y Zetsia, un cantante hoben femenino bunita tawata canta cancionnan “ Pata pata”,
“Buena suerte”, “Venus”, “Satisfaction” “La Bamba”, “Mi Limon mi limonero” y hopi mas cu
a pone hopi hende subi e pista y los e pianan y heupnan un crenchi. Lady Ruth a los di dje asina
hopi, cu pa su mayan e mester a hunta algo contra dolor di spier. Ora Lady Ruth ta baila, ta tur su
spiernan ta baila hunto cu’ne. Ta asina bunita di parti di e organisadornan, pa organisa e dushi
Happy Hournan bailabel aki na Nautical Club cu entrada gratis , mescos cu e Happy Hournan na
Djiespies Place ariba Diabierna anochi,( numa e musica ta totalmene diferente.) Ta personanan
cu ta stima nan mes y goza di bida cu ta hasi posibel pa mas hende goza di bida tambe. Manera
Lady Ruth ta bisa regularmente, alegria nos por crea, tristeza sa bati na porta di mes. E
organisadornan ta stima Aruba y nan prohimo sigur pa hasi esaki di curason. DANKI lieve
mensen pa organisa e bunita y dushi anochinan bailabel aki, laga hopi di edadnan 40, 50 of 60
plus goza un mundo expresando nan mes alegremente den nan movecionnan. Bo no ta topa cu
hobennan teenagers na e fiestanan aki, pero si cu adultonan cu ta sinti nan mes hoben ainda den
spirito y curason cu nan clase di musica. Danki “We and We Band” : Zetsia (vocal), Wiwi
(guitar), Anthony ( guitar), Emercio (bass) y Tony (drums) pa e dushi anochi recientemente y
cu mas lo sigui ! Danki pa lesa nos relato. Un “bearhug” di Lady Ruth pa bosonan tur ! Un felis
dia yen di sabiduria den nos alegria ! Danki na prensa pa nan bunita cooperacion di curason.
