ORANJESTAD,Aruba
Cruz Cora Aruba ta extende su programa di asistencia di cuminda na famianan mas vulnerabel cu a perde nan entrada dor di e pandemia di Covid-19. E organizacion humanitario lo incrementa su esfuerzonan na Aruba y enfoca riba yuda famianan den necesidad cu E-vouchers pa cuminda y cuminda cayente pa esunan cu no por cushina.
“Hopi famia ta pasando den momentonan dificil durante e crisis di Covid-19” Director di Cruz Cora Aruba, Michel ta Haye, ta bisa. “Desafortunadamente, e crisis aki no ta mustra di ta na su final por lo pronto na Aruba. Na momentonan aki, tin mas cu 3000 caso positivo di Covid-19 na Aruba. Nos ta premira cu sosten adicional lo ta necesario pa sobrebibi e crisis, por lo menos te December”.
Den e prome fase di e programa di ayudo aki, Cruz Cora a entrega 4500 famia E-vouchers. Awor den e di 3 periodo di registracion, a ricibi mas cu 6000 peticion. Esakinan aworaki ta wordo yama y ta wordo evalua, ya cu tin prefencia pa yuda casonan mas vulnerabel.
E-Voucher
E E-voucher ta funciona manera un debit card di Cruz Cora y por wordo usa den supermercado local pa cumpra cuminda y productonan di hygiene personal y cas. Aworaki e voucher por wordo usa den: Super Food, Save More Boegoeroei y San Nicolas, Do-It Super Center, Cheng’s Supermarket y Johnsons’s Supermarket. E voucher no por wordo usa pa cumpra alcohol of producto di tabaco.
Cuminda cayente (Meals on Wheels) y pakete di cuminda
“Den e prome fase di e programa di asistencia aki di Cruz Cora, a conta cu partners cu a distribui pakete di cuminda y cuminda cayente. Cruz Cora ta hopi agradeci na e organizacionan aki pa e tremendo trabou di tur e voluntarionan cu a yuda nos yega na famianan den necesidad. Den e di dos fase, nos lo enfoca mas riba e E-voucher, ya cu esaki ta un metodo sostenibel y digno pa asisti famianan pa un periodo largo”, La Haye ta splica. Y pa esnan cu no por cushina, lo tambe entrega cuminda cayente merdia.
Registracion y Proceso
Den e di tres periodo di registracion, Cruz Cora a haña mas cu 6000 peticion pa ayudo. Esaki ta un cantidad hopi grandi y ta tuma tempo pa procesa. Un team di voluntario ta haci entrevista cu video-call diariamente pa por evalua e situacion di cada persona cu a haci peticion aplicando su 7 principionan fundamental mundial di etica. Esun mas importante: Yuda esnan mas vulnerabel SIN distincion di raza, religion of nacionalidad.
Telefon # 166
Cruz Cora Aruba su team di voluntario ta sostene Dokternan di Cas y Ambulance den e tarea di atende patientnan cu Covid-19. Esaki ta un sistema di warda unda un dokter di cas lo ta disponibel pa casonan di emergencia di Covid durante 7’or di anochi pa 7’or di mainta. Por yama e number 166. Lo tin posibilidad pa haña un evaluacion na cas dor di dokter di cas hunto cu personal di Cruz Cora y ambulance lo ta standby pa si constata cu e patient mester bai hospital. Cruz Cora ta pidi pa por fabor yama # 166. Keda cas y no presenta na Cruz Cora. No ta ricibi bishitante na Cruz Cora, pa asina por cuida voluntario y trahadornan pa por sigui cu e trabou di yuda comunidad