Den presencia di algun miembro di parlamento, Minister di Turismo, Hunta di Supervision di A.T.A., CEO di A.T.A., CEO di APA, CEO di AHATA, ekipo di A.T.A. y socionan di industria crucero, a efectua otro edicion di ‘Cruise Symposium’ riba Dia Mundial di Turismo den ballroom di Aruba Marriott Resort & Stellaris Casino. Touch of Steel a ricibi tur participante cu musica di steelpan. Minister Oduber, CEO di A.T.A. y CEO di APA a hiba palabra na esan presente, sigui pa un presentacion di ‘Aquila Center for Cruise Excellence’, un socio di A.T.A. den e industria crucero.
Ronella Croes, a papia di strategia y proyectonan pa turismo en general y despues a enfoca riba e industria crucero. Mester bisa cu pa e industria aki e crisis a trece cu n’e su mesun set di desafiio y e industria aki a rekiri un tempo adicional pa re-inventa su mes prome cu cuminsa di nobo. A pasa casi 15 luna entre e momento cu e ultimo crucero cu a sali na maart 2020 te na e yegada di e prome crucero cu pasahero na juni 2021. Ta mira cu e cantidad di pasahero riba e cruceronan ta subiendo tambe, pues un recuperacion den cantidad di pasahero ta evidente.
E cantidad di crucero cu a yega nos puerto den zomer tabata menos cu na 2019, sinembargo, Allure of the Seas, a yuda recupera cantidad di bishitante den zomer substancialmente. A realisa hopi esfuerso durante varios aña pa nos waf ta cla p’asina ricibi barco crucero di e ‘Oasis Class’, pero ta remarcabel cu ta durante un aña di pandemia nos tabatin e oportunidad di ricibi Allure of the Seas, nos prome barco di ’Oasis Class’, na mei di e aña aki. Ta trata aki di e cruceronan mas grandi na mundo. Esaki sin duda ta un tremendo “show case” pa demostra e confiansa cu e industria tin den e ‘marca’ y alabes e balor cu tin p’e ‘marca’ aki cu yama Aruba. E balor p’e marca aki tambe ta destaca, si considera e echo cu Aruba ta competi di cerca cu no solamente mas destinacion sino tambe cu e islanan priva di algun di e lineanan crucero den termino di atraccion y satisfaccion. Maske cu ainda ta bou di e cifranan di 2019, e recuperacion ta rib’e bon caminda, cu un recuperacion premira na 80% pa 2022 y entre 90% y 100% pa 2023.
E impacto economico di turismo crucero ta algo cu Aruba Tourism Authority, Aruba Ports Authority y Ministerio di Turismo ta midi periodicamente. Pa loke ta trata e proyeccion pa aña 2023, ta premira cu e lo surpasa esun di 2019. Un estudio recien, realisa pa e University of Central Florida pa A.T.A, a descubri cu un aumento di 1% den ganashi pa turismo ta conduci na un aumento di 0.6% den e nominal GDP. Pues ta esencial pa ofrece experiencia nobo como tambe productonan si nos kier sigui supera e expectativanan di nos bishitantenan y na mes momento aumenta nan gasto riba nos isla.
