Si nos wak rond di nos e situacion mundial, cuanto dolor y cuanto tristesa, cuanto problema social, nos
mester yega na e comprondemento cu ta Dios so por yuda nos.
Y Dios a presenta nos e solucion den Juan 3:16, y a bolbe wordo confirma den Juan 14:1-4, pasobra
mundo a drenta den e situacion manera ta para scirbi den Genesis 6;5.
Amor di ser humano pa ser humano ta manera paralisa, hende ta studia tur forma pa caba cu otro, den
forma di guerra, terorismo, vengansa di siglonan cu ta parce cu no ta caba nunca, y esey ta demostra
nos un biaha mas cu Cristo Hesus ta e solucion.
Hopi famia ta pasa den dificultad, pa falta di conocemento di e palabra di Dios, hopi ta papia di famia
disfunctional, dicon na ta disfunctional pa falta di e presencia di Dios den e cas. Nan no tin guia, y
door di esey e enemigo ta haci y deshaci den e famia, y ora nos bin wak e situacion bon,no ta placa ta
falta, pero ta falta di amor den famia.
Awor segun tempo ta pasando nos ta mira cu e instituto cu yama famia, ta wordo ataca di tur banda,
pasobra diabel ta odia famia, pasobra famia ta e prome union cu Dios a institui riba mundo aki.
No solamente famia ta wordo ataca cu pica manera aldulterio, maltrato fisico y verbal , pero famia ta
wordo ataca fuertemente den forma spiritual especialmente ora fe mester wordo practica, y asina evita
cu cobardia y flohera por domina.
Y Señor ta esun cu lo bay bo dilanti, E lo ta cu bo,E lo no fayabo ni bandonabo. No tene miedo ni
desmaya.(Deutoronomio 31:8).
No tin duda cu famia a wordo institui door di Dios, pesey ta esnan cu ta bringa contra famia, ta contra
Dios nan ta bringa, pasobra ta Dios a manda e ser humano pa bay y multiplica y yena e tera. Ta Dios
mes a bisa cu e homber lo bandona su mama y su tata y uni cu su esposa. Y nan lo bira un carni.
Tur hende riba mundo a bini di un famia, tur hende a nace for di un homber y un muher, pasobra esey
ta mandato y boluntad di Dios. Esey ta e unico forma pa multiplica biologicamente e ser humano.
Awor mirando e direccion cu inmoralidad, malicia, orguyo y arogancia a aumenta rond mundo, ta
tempo pa nos cuminsa haci tur locual ta na nos alcanse pa asina Cristo Hesus bira e prioridad pa tur
famia.Pasobra pa lanta un famia sin presencia di Dios den cas, e bida ta bira dificil.
Nos tur ta mirando e decadencia, e violencia, e division, cu a drenta famia, ta un dolor ora bo puntra
un mucha pa su rumannan y bo ta haña e contesta “ami no sa di e hendenan ey” pero nan ta bibando
den mesun cas.
Otro asunto doloroso ta cada rato bo ta tende cu ami ta biba, cu mi mama, of cu mi tata, of serca mi
wela esey ya caba ta un demostracion cu algo a pasa den famia.
Enbes di mayornan uni hunto pa cria nan yiu, nan ta hiba otro dilanti di hues pa kita yiu for di otro.
E misericordia di Dios ta necesario, e arepentimento cu mester bini di tur bos banda, pasobra aunke
nan no ta hunto, nan no por keda odia otro pa semper, pasobra e palabra di Dios ta bisa si nos pordona
nos prohimo Dios tampoco lo pordona nos.
Dios tene misericordia.
Sinceramente, Pastor Marcel Balootje.
