For di 8 di yanüari 2024 Margareth Craneveldt ta asumí e puesto di hefe di departamento di komunikashon di entidat públiko Boneiru. Margareth ta drenta ku un eksperensia amplio, prinsipalmente riba tereno di benta, merkadeo i relashon públiko. Su kalidat komprobá di liderazgo a bini fuertemente dilanti den su funshon anterior komo Sekretario General / Direktor na Federashon Futbòl Kòrsou (F.F.K.).
Promé ku su binida na entidat públiko Boneiru, Margareth tabata dirigí maneho diario di ofisina di e federashon, kaminda e tarea di motivá i duna guia na personal tabata para sentral. Su abilidat fuerte di liderazgo i su kompetensianan komo ‘People Manager’ a kontribuí konsiderablemente na kresementu i desaroyo di Federashon Futbòl Kòrsou (FFK). Margareth su fleksibilidat ta hasié un lider balioso, prinsipalmente den ambientenan dinámiko kaminda adaptashon ta krusial. Su pashon pa su profeshon ta impulsá su aspirashon kontinuo pa yega na konosementu i mehorashon, loke ta dun’é gana di siña i dinamismo na momentu di asumí desafionan nobo i atkirí abilidatnan nobo. Tur e kalidatnan akí tabata e yabi pa logra éksito na FFK i sin ningun duda lo ta di gran balor den su ròl nobo na entidat públiko Boneiru.
Den su funshon nobo Margareth ta desidido pa, huntu ku su tim, mehorá komunikashon di entidat públiko Boneiru tantu internamente komo eksternamente. E ta boga pa komunikashon i transparensia klarito i efektivo, loke ta esensial pa edifiká konfiansa entre entidat públiko Boneiru i komunidat. Un otro meta importante pa Margareth ta stimulashon di partisipashon di siudadano. E ta kere ku un diálogo habrí entre entidat públiko Boneiru i abitantenan di Boneiru ta krusial pa komprendé e nesesidatnan i preokupashonnan di nos komunidat i atendé ku esakinan.
Margareth su eksperensia, su kapasidat pa traha tantu den forma independiente komo den tim, i su pashon pa e profeshon di komunikashon ta di gran balor den su funshon nobo. Ku nombrashon di Margareth, entidat públiko Boneiru ta spera un mehorashon fuerte den ehekushon di su maneho i strategianan di komunikashon.