ORANJESTAD,Aruba
Oficialmente, prome di augustus ta e fecha cu un aña escolar nobo ta cuminsa. Tambe prome di augustus ta e fecha na Aruba di aniversario di e gran mayoria di docentenan cu ta traha na Aruba. Algun a cumpli 40 aña di servicio otro 5 aña y tin cu a cuminsa apenas awor. Prome Minister Evelyn Wever-Croes ta manda palabranan di felicitacion na tur docente, tur maestro y maestra cu e fecha special aki.
Mi ta gradici boso pa tur loke boso a haci pa nos hobennan y Aruba en general. Cu Dios bendiciona boso p’e bunita trabou cu boso ta haci pa forma nos muchanan pa un miho futuro”.
Prome Minister a subraya cu e aña escolar 2019/2020 no tawata uno facil. E tawata un aña hopi turbulento. E crisis di COVID-19 a interumpi practicamente henter enseñanaa y a laga duda si enberdad nos ta cla pa drenta e era nobo den enseñansa. Pero Covid a pone nos realisa y forsa nos mes pa prepara nos mes miho pa mas innovacion den enseñansa.
E tawata un aña tambe hopi turbulento den e veld mes akinan na Aruba. Prome Minister, caminda cu tawata por, a purba di interveni y a purba di trece trankilidad den enseñansa. Pasobra ta esaki nos muchanan mester.
Mi deseo pa e aña escolar nobo aki, den e aña di innovacion y enseñansa, ta pa e lo ta uno mas trankil especialmente den e veld mes pero tambe hopi mas exitoso pa nos docentenan y nos studiantenan.
Educacion ta e pasaporte pa e futuro di nos muchanan. Y e futuro ta di esnan cu ta prepara p’e awe. Boso aporte na enseñansa ta di suma importancia. Danki pa boso aporte y mi ta conta cu boso aporte atrobe den e aña nobo aki y boso por conta cu mi tambe”, Prome Minister a expresa na e docentenan den e aña escolar nobo