Diaranson mainta 24 di november e cortejo funebre ex Minister di Husticia señor Hyacinto Rudolfo ‘Rudy’ Croes a pasa dilanti di Bestuurskantoor. Prome Minister y demas Ministernan di Gabinete Wever – Croes tabata presente pa ricibi e ultimo bishita na Bestuuskantoor di señor Rudy Croes. Gobierno a entrega un krans den nomber di Gobierno y pueblo di Aruba.
Cu hopi tristesa, tur esnan presente a brinda sosten na casa y yiunan di Señor Rudy y a tuma despedida di sr. Rudy Croes, naci dia 5 di september 1946 y a fayece 20 di november 2021. Señor Rudy lo wordo recorda pa semper pa tur locual cu el a haci pa nos dushi pais Aruba lagando atras un legado di fe y determinacion, lucha y optimismo. Señor Rudy tawata un co-fundador di partido MEP, Parlamentario, Minister y a fungi den diferente area manera cultural y deporte a traves di diferente proyecto grandi na biniestar di Aruba. Señor Rudy Croes ta un gran baluarte di nos pais. Aruba a perde un gran yiu di tera.
Gobierno di Aruba ta expresa palabranan di forsa na henter famia y tur ser keri. Cu Rudy Croes sosega na paz.
