ORANJESTAD, Aruba
E homber Giovanny K a bay Corte pidiendo pa ordena aeropuerto sigui pague su salario y lague traha bek. Esaki despues cu nan a kit’e “op staande voet” dia 5 di September, 2019, pa intimidacion sexual cu un empleado cu ta traha bou dje. Sinembargo Corte, despues di analisa e caso, a yega na e conclusion cu cu Triple A, basa riba nan maneho di cero-tolerancia cu intimidacion sexual, tabatin motibonan hustifica pa finalisa e relacion di trabou cu K.
E homber aki ta den servicio di aeropuerto for di aña 2000 y na momento di e sucedido e tabata ocupa e posicion di supervisor. Y e maneho aki ta haci visibel pa tur empleadonan entre otro den reglanan di compania y den Contractonan Colectivo cu keda firma.
Dia 22 di augustus gerencia a haya denuncia cu el a actua di un forma inapropia of a haci remarcanan inapropia cu un contratista y a mishi cu su bariga. E empleado aki pa miedo no a raporta e incidente mesora.
El a ofrece e uzo di su locker na e empleadonan en cuestion y a bis’e cu tin algun condom cu por wordo uza den e area ey so y cun’e, of palabranan similar. Ora cu gerencia a confront’e cu esaki, el a admiti di a menciona e usa di condoomnan pero cu esaki tabata den forma di un joke.Y tambe a confront’e cu e hecho cu el a mishi cu bariga di e empleado. Den e reunion ey di dia 23 di augustus, a inform’e cu tur esaki ta motibo pa retiro inmediato entrante 5 di September, 2019.
E pregunta cardinal di Corte den esaki ta si e incidente cu a tuma luga rond di 14 di augustus, 2019 ta un motibo urgente pa retiro di inmediato. Mester menciona, e empleado pa miedo di represaya no a raporta e incidente sino te algun dia despues.
Triple A durante tratamento di e caso a trece dilanti cu e empleado en cuestion tabatin apenas 18 aña, tabatin apenas tres siman trahando y esey tabata su prome trabou. Ademas, e como supervisor tabatin influencia directo riba e hoben cu ta cay bou di dje y tabata esun cu ta dicidi si e hoben ta wordo yama bek pa haci trabou na aeropuerto den futuro.
Corte a conclui cu tur e ariba menciona ta motibo urgente pa dun’e su retiro. Mas ainda pasobra e tabata na altura di e maneho di cero-tolerencia di aeropuerto riba e tereno aki. Como supervisor e tabata sa cu haci actonan asina y cu un persona trahando bou dje y dependiendo di dje, ta algo inaceptabel. E ponencia di e supervisor cu no tabata trata di intimidacion sexual sino joke cu normalmente ta haci na pia di trabou, ta un splicacion cu Corte no a acepta.
Ni a cantidad di añanan di servicio di dje no ta pisa contra e actitud sexista di dje pa cu un empleado vunerabel y dependiente di dje pa sigui haya trabou.
Pa tur e motibonan aki, a rechasa su demanda y su retiro ta keda valido.
